MPL9 zan inkhel hmasa ber FC Venghnuai Vs Chanmari FC

Zanin dar 7:00 hian RG Stadium-ah FC Venghnuai leh Chanmari FC te an inhmachhawn dawn a, Zote Honda MPL9 zan inkhel hmasa ber a ni ang. Chanmari FC-in point ruk hmu tawhin pahnihna an ni a, FC Venghnuai erawh point hnih chauh la hmuin paruknaah an awm thung.

Chanmari striker Lalhriatpuia'n match hnuhnung berah goal a khung tawh a, Hriatpuia hian goal khung a chhunzawm zel theih chuan coach Rochhingpuia tan chanchin lawmawm a tling dawn. Chutihrualin MPL U18 best striker Lalnunzira a inhliam a, Ramhlun South tlangval Lalremruata (Bata) nen an chhawr thei dawn lo.

Chhinga chuan, "FC Venghnuai ai hian kan ṭha zawkah ka ngai a, kan chak pawh ka ring. Chutihrualin coach ṭha tak hnuaia khel an ni a, kan chak a nih pahwin kan chakna a tam kher lo ang," tiin team ṭha zawka a inngaih thu Vanglaini a hrilh.

Chanmari hian midfielder talent nei ṭha C. Lalhunmawia (Lahuna) bakah rawlthar ṭha rual an kawl a, tawnhriat nei ṭha Malsawmzuala leh Lalramchullova te ho an kawl avangin Chhinga'n Venghnuai aiin player kan nei ṭha zawk a ti pawh hi a pawmawm hle.

Chutihrualin Venghnuai hian chak la nei lo mah se ṭum khat chiah an la chak lo a, coach Lalrindika Hmar hote hi an vanneih tawk loh avang chauha chak hmel la hmu loah pawh a ngaih theih.

FC Venghnuai tana harsa tur erawh captain Vanlalthanga chu hrem vangin a khel thei dawn lo a, VL Thanga hmunruak hnawhkhah hi a awlsam lo ang. Rindika'n Chanmari laka point hlawh chhuak turin ruahmanna ṭha a neih a ṭul dawn a, Venghnuai mipuiin an thlawp ṭhat a ṭul bawk ang.

Venghnuai tan C. Ngurnuntluanga a hmuhnawm ṭhin a, Chhinga Veng laka point an hmuh theih nan pawh C. Nuna hian goal hlu tak a khung. Chhingcows lakah hian keeper Joel B. Lalramchhana chu man of the match-a thlan a ni a, ani hi kumin MPL U18 -a best keeper kha a ni.

MPL Thlirna Tawi
FC Bethlehem winger Lalruatpuia'n goal hnih a khung tawh. South Sabual tlangval Ruatpuia hian FC Venghnuai leh a club hlui Aizawl FC an hmachhawn ṭumin goal khat ve ve a khung.

MPL9-ah match 12 awm tawhin goal 30 a lut tawh a, match tina goal 2.5 lut ang zel a ni. Own goal pakhat a awm tawh a, own goal chhiar tel lohin player 27-in goal an khung tawh. Aizawl FC-in goal sarih khungin goal an khung tam ber a, Mizoram Police leh Chhinga Veng ten goal khat ve ve chauh an la chhuah.