A tawp khar ṭhat duh Muguruza

Garbine Muguruza chuan a tan season duhawm a ni lo tih a sawi a, chutihrualin kum ṭha tak ni lo mah se a hmawr bawkna chu ṭha taka tih a duh - Pan Pacific Open an khelh laiah champion ngei a tum.

Nimin khan Muguruza hian a match hmasa ber a khel a, qualifying kaltlanga inlan Despina Papamichail chu 6-4, 6-2 in a hneh. Tun hnai tournament a khelh hoah match hnih chak zawn a nei ngai meuh lo, a tan fiahna a ni dawn.

Grand Slam vawi hnih champion tawh Muguruza chuan, "Season harsa ve tak chu a ni, tun hnai thla 10 chhunga ka tournament khelhte hi a harsa em em vek," tiin season a hman ṭhat loh thu a sawi.

Kumin tir lamah kha chuan Muguruza hi world number 3 a ni a, tunah erawh number 12-ah a tla hniam tawh. Tournament a khelh hnuhnung parukah phei chuan hneh nei loin a tla vek, insiamṭhat a mamawh takzet.

French Open leh Wimbledon champion tawh chuan, "Dawhthei takin ka tana hun ṭha lo thlen hun ka nghah a ngai, duhthusam ang chuan season hmang ṭha lo mah ila a hnu kharna hi chu ṭha tak ni thei thung se ka duh," tiin a sawi.

Nimin inkhel dangah Zhang Shuai chuan seeded pahnihna Caroline Garcia chu 4-6, 7-6 (5), 7-6 (5) in a hneh, kum 33 mi Zhang tan inkhel result hi thil lawmawm bik a ni ang.