Grealish-a'n Southgate a chhan

Manchester City midfielder Jack Grealish chuan England coach Gareth Southgate a chhan a, a pu an sawiselna chu a na mah maha a hriat thu a sawi.

England hian June-ah Nations League match li khelin, chak an nei miah lo a, Hungary lakah (1-0 & 4-0) vawi hnih ngawt an tlawm bakah Germany (1-1) leh Italy (1-1) an inhnehtawkpui.

Grealish chuan, "A chang chuan an sawiselna hi a na mah mahin ka hre ṭhin a, mahse, English mi nih chuan hei hi kan tawn tur a ni tlat si - kei pawhin ka tawng fo a ni," a ti.

Southgate kaihhruaina hnuaiah England hian World Cup 2018 semifinal an lut a, Euro 2021-ah final an lut bawk. Nations League match li ngawt an chak zawh loh hnu hian Football Association chairwoman Debbie Hewitt chuan Southgate chunga rinna an nghah thu a sawi a ngai hial a ni.

Kum 27 mi Grealish chuan sawi zawmin, "Nikum khan Euro 2020 final kan lut a, kumina kan match hnuhnung berah Hungary kan ngam lo thung. Mahse, hemi hmaa minute 90 chhunga kan tlawm hnuhnung ber chu November 2020-a Belgium kan ngam loh kha a ni daih tawh a ni," a ti bawk.

Aston Villa aṭanga pound maktaduai 100-a City pantu Grealish ngei pawh hi tun hnaiah English media aṭangin sawiselna a tawk nasa a, City tana a khelhpui Kevin de Bruyne chuan English player-ten beih an tawh bik thu sawiin a chhan hial.

Grealish chuan, "KDB thusawi hi ka hrethiam. Mahse, ka ngaihdanah chuan hei hi kan rama thil nihphung ve pakhat a ni bawk. A bik takin kan dinhmun hi en ula - khawvela club langsar ber pawl, kum tina nomawi chawi tan ka khel a.

"Ka man zat zawng zawng nen, mipui hi chuan sawi tur an nei reng dawn. Keimah zawk hian ka pawm thiam mai a ngai a ni. Hei hi football leh ka hun tawnin a ken tel ve pakhat ni maiah ka ngai," a ti.

England hian Zirtawpni zan dar 12:15-ah Nations League an khel dawn a, khualmualah Italy an lenchilh ang a, September 26, Thawhṭanni zan dar 12:15-ah Germany an mikhual bawk ang.