Griezmann - hmana rim rawn, Barca tana phurrit ni ta chu!

Khawvela club lian ber ber ten, sum tam tak tawk tarh chunga Antoine Griezmann an rim lai kha hmanni lawk a ni - tunah erawh Barcelona duh loh player, an phur tirittu mai a chang ta.

Griezmann hian a club hlui Atletico Madrid-ah loan-in hun a hmang mek a, club pahnih inremna ang chuan Madrid khaw club hian a loan zawhah a ngheta an lei theihna dan a awm.

Mahse, ui tak chunga Barca hnena hralhtu club hian man to taka an player hlui lei let loh dan an ngaihtuah a, season kal mekah 'ren' tak chungin Griezmann an hmang mek.

Hei hi Barcelona chuan duh loin court-a kal an tum, tih thlengin thawm a awm mek a, an buaina hian reh lam a la pan mai dawn lo niin a lang a, buaina mak si, tak si hian football khawvel titi a luah hneh hle.

Buaina chu
August 2021 khan Atletico-ah Griezmann a kir a, season khat chhung atan loan-in a zawm phawt a, a loan hun hi kum khat dang pawhsei theiha tih niin, Atletico hian euro maktaduai 40-a a ngheta an lak theihna dan ziah tel a ni bawk.

Mahse, he contract-ah hian a hunlaia vantlang hriata puanzar ni lem lo ziah tel a awm a, chu chu Griezmann hian Atletico-ah match khelh tur an neiha 50% ah minute 45 aia tam a khelh chuan Madrid khaw club hian €40mtd-in an lei ngei ngei a ṭul dawn.

Season hmasa khan Griezmann hian Atletico match 80% ah minute 45 aia tam a khel a, tun season-ah hetiang bawka a khelh leh chuan Atletico tan €40mtd insen ngei a ngai dawn.

Atletico hian Griezmann hi Barca-ah thawn kir pawh ni se, Catalan club hian an mamawh lo a, man to taka hralh a harsa tawh dawn bawk - hei hi Atletico chuan an hre reng a, Pathianni zan derby-ah bul a ṭan tih lohah chuan tun season-a an inkhelah minute 62, 62, 64, 63, 61, 63, 62-ah te luhtir a ni!

Club tan
Atletico Madird chet dan hi ṭhenkhatin an dem a, a bik takin coach Diego Simeone-an kawh rawn a hlawh. Argentine manager hian Champions League-a Porto an hmachhawn zawh khan, "Minute 30 a khelh hian a khel ṭha tlat a ni.

"Minute 60 khel ta se, eng angin nge a khelh ang tih kan hre thei lo a ni," a ti a, a player an khelhtir dan chu team-in an hlawkpui vang niin a sawi - a awihtu erawh a tlem zawk an ni.

Simeone hian a thusawiin awih a hlawh lo tih a hre ve reng a, inthupmawi a tum zui lo. Argentine coach chuan, "Kei chu club tana ṭha tur ti mai ṭhin ka ni," a ti a, hotute thu a hmuh anga thil ti a nih thu a sawi.

He buaina karah hian Griezmann-a mize ṭha tak a lo lang chhuak ve thung - club pahnih inhrui pawhna karah a tuartu ni mah se ngawi rengin a tuar a, khelmual a luh rualin theihtawp a chhuah zui a, a phunnawi miah lo!

A bul ṭantu
Barcelona an lungawi lo a, court-ah kal an tum nia sawi a awm - mahse, he buaina hi nguna taka en chuan Catalan club hi an thiam lo hmasa zawk niin a lang a, Griezmann chungchanga Atletico nena an indawrna hmasaah an rinawm tlat lo.

Catalan club hian July 2019 khan Atletico aṭangin Griezmann hi a release clause pound maktaduai 107 in an lei a, mahse, he inremnaah hian Atletico an lungawi lo a, Barca leh Griezmann te chu French forward release clause a tlakhniam hmain an inrem hman tawh niin an sawi.

Atletico sawi dan chuan Barca hian an player hi a rukin inremna an lo neihpui vek tawh a, hetihlaia Griezmann-a man zat chu pound maktaduai 179 a ni. Mahse, French forward an lakluh thu puang turin a release clause tlakhniam hun an nghak a, £107mtd-in an lei ta daih!

Hetihlai hian Atletico chuan, "Griezmann-a man a tlakhniam hma khan player leh Barca hi an lo inrem tawh ngei a, chuvangin Barca-in pawisa min pek zat hi a dik lo a ni," an ti a, Barca chuan an contract-a an ziah dan enchiang mai turin Atletico hi an lo hrilh.

A hun a thleng
Atletico-in an chunga Barcelona chet dan an la hre reng a, Catalan club hian Atletico-in Griezmann an hman danah thil dik lo a awm tih an sawi a, Atletico hian Barca chu an inremna contract-a thil ziak en mai turin an lo ti ve thung!

Barcelona hian kar hmasa khan Atletico hi dan anga hmalakah an vau a, mahse, Madrid khaw club tan hlauhawm a awm lo - loan-a an hawh mek player a nih miau avangin Griezmann hi an ta a ni a, an duh ang zat zat minute khelhtir turin zalenna an nei tlat!

Ronald Koeman chuan 2007-08 khan, Valencia coach a nih chhung chuan David Albelda chu a club tan a inlan tawh loh tur thu a sawi. Spanish midfielder hian court-ah Koeman a khing a, mahse, court-in Koeman thiam a chantir.

Barcelona pawh hian dan anga hmalakah Atletico hi vau viau mah se Madrid khaw club hian an dinna an hrechiang a, an hlau lo ang. French chanchinbu L'Equipe chuan club pahnih hi €25mtd-in an inrem dawn niin an sawi a, Atletico-in an phat laiin Barca erawhin beiseina an nei thung.

Sual rit phurh lo deuh!
Barcelona tan thil buaithlak deuh a awm - Atletico hian Catalan club-ah kir tir pawh ni se, phurrit mai a ni dawn tih an hria a, €40mtd sen ngai lo hian an forward hi an nei theiah an inngai.

Griezmann hian June 30, 2024 thleng Barcelona-ah contract a la nei a, Catalan club-ah hian kum khatah €38mtd a hlawh bawk - Barca tan chhawr loh tur player tan season khata heti zat la sen hi uiawm tak a ni.

Chuti a nih chuan Barca tan a thlawna chhuahtir mai pawh a hlawk zawk thei dawn tihna a ni a, chutihlaia €40mtd lo sen ṭalh hi Atletico tan thil âtthlak tak a ni ve thei tlat.

Hetihlai hian World Cup a hnai tawh a, Griezmann tan minute tam lo tak khelh reng hi a fuh lo ve thei. France coach Didier Deschamps chuan, "A hahdam deuh tal ang chu," tiin Atletico-in a player an chhawr dan chungchang a sawi!

Sulhnu
Khawvela club liante inchuh rawn forward-in tun dinhmun a thleng ta mai hi tam tak tan chuan hriatthiam a har viauin a rinawm - chutihrual chuan Griezmann hian Barca-ah beisei a phak lo a, a chhan bulpui chu 'amah' a ni.

Catalan club-ah hian match 102 khel hmanin goal 35 chauh a khung. Chutihruala hriat tel tur erawh Barca team talbuai ṭanah a lut a, khelh dan mumal a nei lo a, a chang leh ding lamah, a chang leh vei lamah, sawn kualin a awm reng a, a bel tak tak hman lo chungin boruak chhia erawh a nei ngai chuang lo!

French forward hi Lionel Messi 'position' a a khelhin a ṭha ber, tih chu tlang hriat ni mah se Messi em sawnchhuah nan a tling tawk bawk si lo - tunah lah Xavi hoin team thar din a ni a, Griezmann tan hmun a awm tawh lo tih a lang.

Griezmann hi Barcelona senior player-te lakah khan a tlatlum lo nia sawi a ni bawk a, Gerard Pique, Jordi Alba leh Luis Suarez te nen an inkawmngeih lo - tun season-a match riat aṭanga goal thum khungtu hian Barca-a kir ai chuan Atletico-a cham a châk ang, tih a chiang a, a kal zel dan tur chu hunin a hril ang.