Ka chawlh chhan chu hliam vang a ni - Federer

Roger Federer chuan tun hnai khan Laver Cup zawh hunah tennis a chawlhsan tur thu a sawi a, a infiamna ngainat leh khelh thiam ber mai a chawlhsan chhan hi hliam vang a nih thu a sawi.

September 23-25 chhung hian London khawpuiah Laver Cup an khel dawn, chumi hnuah chuan Federer hian ṭhangkhat lian zet a lo vawn tawh tennis racquet chu a dahṭha tawh dawn.

Kum 41 mi Federer chuan, "Tun hnai kum thum chhung hi chu a harsa takzet a ni, a nihna takah chuan ṭha taka inkhel leh thei turin theihtawp ka chhuah reng a, tunah zet chuan ngai ka awh leh phak ka ring ta lo.

"Ka hliam endik leh a ni a, tun hnaia endikna hnuhnung ber result chu ka beisei ang a ni lo, a nihna tak sawi chuan tennis khel leh tura beiseina ka neih ṭhin kha a thamral," tiin a sawi a, a chawlh chhan ber chu hliam vang a ni.

Federer inlanna tur hi mimal inelna a ni dawn lo. Laver Cup-ah chuan Europe khawmualpuiin team an nei dawn a, anni hian khawvel hmun dang zawnga awmte intelkhawm an hmachhawn ang.

Laver Cup hi vawi nga an neihna tur niin, kumin chu Federer pual a nihna chen a awm dawn. Season dang zawng aiin Federer vangin khawvelin a ngaihven zual dawn a, tennis ngaina tute tan chuan a lunglen thlak nghal bawk dawn a ni.