Intlansiak tam ber neih tum

Formula 1 thuneitute chuan season thara F1 calendar tur an ti chhuak a, car intlansiakna sang berah hian inelna vawi 24 awm turin ruahmanna an siam, an tum anga a hlawhtling thei a nih chuan intlansiak tam ber ṭum a ni ang.

Las Vegas khawpuiah inelna a awm dawn a, hripui leng vanga an thlen theih loh reng hnuah China chuan a thleng thei tawh dawn bawk, anni pahnih bakah hian Qatar chuan F1 hi a thleng dawn a ni.

Ruahman dan chuan March 5-ah inelna hmasa ber chu Bahrain-ah neih a ni ang, a tawp ber chu November 26 hian Abu Dhabi-ah neih a ni thung ang. Dinhmun chiang loa an sawi Monaco leh Belgium te chuan inremna awm sa angin an thleng zui ang.

Monaco hian 2023 calender chhuan hnu lawkah thu lawmawm an nei zui, kum 2025 thleng atan inremna an ziak thar bawk. Tuipui kama tlankawng mawi takah F1 car an tlan chhunzawm dawn tihna a ni.

Ram leh khawpui ṭhenkhatin thleng thar dawn mah se, beiseina nena thlirtu South Africa erawhin season tharah chuan an la thleng thei dawn rih lo, an thlen theih hun tur tarlan a la ni lo bawk.

F1 president Stefano Domenicali chuan, "Season thar atan calendar ṭha tak kan siam thei hi ka lawm. Las Vegas khawpuia intlansiak kan hmu tur hi a lawmawm a, chutiang bawkin Europe leh Asia khawmualpui ten an thlen chhunzawm leh tur pawh hi a lawmawm," tiin a sawi.