India-in a tawp an khar ṭha lo

Thawhlehni zan India leh Australia chuan T20 match thum an khelh tura hmasa ber chu Punjab Cricket Association Stadium, Mohali-ah an khel ṭan a, Men in Blue hian 208/6 zet vaw chhuak mah se Australia (211/6) in wicket liin hnehna an chang.

September 23, Zirtawpni hian Vidarbha Cricket Association Stadium, Nagpur-ah match hnihna an khel ang a, match thumna leh a tawpna ber hi September 25, Pathianni hian Rajiv Gandhi International Cricket Stadium, Hyderabad-ah an khel ang.

Bul ṭan ṭha lo
T20 World Cup khel tur India squad an puanin KL Rahul-a tel a, tun hnaiah chet ṭhat tawk loh avangin Lucknow Super Giants captain tel hi sawiseltu pawh an ṭhahnem hle.

Mohali-ah erawh KL Rahul-a'n a theihna a lantir a, ball 35 aṭangin 55 runs an siam. Captain Rohit Sharma leh captain hlui Virat Kohli te erawh an che ṭha lo a, 11 runs leh 2 runs chauh an siam thung.

Suryakumar Yadav-a'n India dinhmun rawn ti ṭhain 46 runs tehmeuh a rawn siam a, che ṭha ta ber erawh Hardik Pandya a ni thung. Gujarat Titans captain Pandya hian ball 30 lekah 71 runs a rawn siam a, match khata runs a siam tam ber ṭum a ni.

India-in over 20 chhungin India 208/6 runs an siam a, Australia nen T20 an khelh ṭuma run siam tam ber a ni a, kum 2013-a 202 runs an siam chu an khum. A tawi zawng chuan India-in bul an ṭan ṭha a, chakpui ngei tur target an siamah a ngaih theih.

A tawp khar ṭha lo
Australia-in khual mualah an huaisenna an pholang a, captain Aaron Finch (22) leh a bul ṭanpui Cameron Green (61) te an che ṭha a, an pahnih inkawp hian over 3.3 lekah 39 runs an siam hman.

Thil theih loha ngaih chu Aussies tan a theih tih a lang a, India fielder-ten ṭum thum lai ball an thlauh bakah hun pawimawhah bowler-te an che ṭha lo.

Green-a'n T20 match hnih a khelhnaah 61 runs siamin ball 30 lek a mamawh. Kum 23 mi Green hi Steve Smith-a'n a rawn thlawp ṭha a, over tawp lamah Matthew Wade-a'n ball 21 lekah 45 runs siamin Australia-in over 19.2-ah 211/6 runs siamin hnehna an chang.

Engnge an sawi?
India captain Rohit Sharma chuan, "Run 200 chunglam chu target ṭha tak a ni a, batsman-te an che ṭha. Chutihrualin bowler-ten hna an thawk ṭha tawk lo a, insiamṭhat kan mamawh a ni," tiin a sawi a, Australia batter-te a fak bawk.

Australia captain Aaron Finch chuan, "Inkhel hmuhnawm tak kan chhawp chhuak a, bowling leh batting-ah lawmna tur ka hmu ve ve. Wicket kan hloh khan run rate a tla hniam a, Matthew Wade leh Tim David te khan an rawn siamrem a ni," tiin a sawi a, World Cup hmaa khelh dan nghet neih hman a ṭul thu a sawi lang bawk.

Thlirna Tawi
September 20, Thawhlehni
Australia bt India
Australia wicket liin an chak

India 208/6
Hardik Pandya 71* (30)
KL Rahul 55 (35)
Suryakumar Yadav 46 (25)

Nathan Ellis 30/3
Josh Hazlewood 39/2
Cameron Green 46/1

Australia 211/6 (19.2)
Cameron Green 61 (30)
Matthew Wade 45* (21)
Steve Smith 35 (24)

Axar Patel 17/3
Umesh Yadav 27/2
Yuzvendra Chahal 42/1

September 23, Zirtawpni
India 7:00 PM Australia
September 25, Pathianni
India 7:00 PM Australia