Atletico-in fans ṭhenkhat an dem

Spanish club Atletico Madrid chuan Real Madrid nen an inkhelh ṭuma, Real forward Vinicius Junior laka fans ṭhenkhat chet dan an dem thu an tarlang a, thuneitute hmalaknaah an puih tur thu an sawi.

Pathianni zan khan Madrid derby-ah Atletico leh Real an intawng a, Wanda Metropolitano-a team pahnih inkhelh hmain fans ṭhenkhat chuan stadium pan pahin, chi inthliarna lam hawi hla an sa.

Atletico Madrid chuan thuchhuah siamin, "Hetianga fans ṭhenkhat chetna hian min tilungawi loin, a zahthlak a, a thinrim thlak takzet a ni. Mi tupawhin kan club 'colour' phena awm chung a, chi inthliarna leh ram dang mi hmuhsitna an lantir hi kan rem ti dawn lo," an ti.

Thawhṭanni khan La Liga chuan thuchhuah siamin, inhuatna chaw chhuak thei ṭawngkam hman a ni chu an dem thu an sawi a, mawi lo taka che fan-te chu man chhuah an nih ngei theih nan thuneitute nen hma an lak tur thu an sawi.

Atletico Madrid chuan, "Hnam hrang hrang, tih dan hrang, khawsak dinhmun thlenga inang loten he club-a hmun an chan theih nana kan inhawnna hi he club hming ṭhat chhan pakhat a ni.

"Fans tlemte chet dan avanga Atleti fans tam tak, zah taka an khingpui team en ṭhintuten dem an hlawh tur hi kan ngaingam lo a ni," an ti a, "Chi inthliarna hian he club-ah hmun a chang lo a, he thil ṭha lo tak do tur hian kan theihna zawng zawng kan hlan a, kan tihbo ṭhak hma chu kan chawl lo ang," an ti bawk.

Atletico chuan fans ṭhenkhat chet dan avanga hrehawm an tih thu sawi langin, fans tlemte chet dan avanga club pumpui dem an rem tih loh thu an sawi bawk a ni.

Real leh Atletico inkhelh hma hian football agent Pedro Bravo chuan goal a khung zawha, a lawm nana lam ṭhin Real forward Vinicius Junior chu lam lo tura tiin, "Spain-ah chuan khingpuite kan zah tur a ni a, zawngte ang maia lam chin hi bansan a ṭul," a ti a, mi tam takin chi inthliarna ṭawngkamah ngaiin Pedro an sawisel a, a hnuah ngaihdam dilna a tichhuak.

Vinicius hian goal khung ta chiah lo mah se Rodrygo goal khung lawm nan a lampui ta tho a, Pedro khan ṭawngkam nei lo ta se chi inthliarna hawia beih a tawk kher lo mai thei.