Hliam vangin Saville inkhel rei thei lo

Pan Pacific Open khelh laiah Naomi Osaka chu nuamsa takin a chak. Japanese nula hi Daria Saville nen an inhmachhawn a, set hmasa bera game hnihna an khelh laiin Saville hi a khup a hliam.

Game hmasa hi Osaka-i'n a la a, game hnihna pawh an khel zo lo. Inkhelh hah ngai loin Osaka a tlang a, champion lai ni mah se tun hnaia result nei ṭha lo Osaka tan chuan hnehna chan hrim hrim hi thil lawmawm a ni ang.

World number 1 hlui Osaka chuan, "Hliam vang hian kei ngei pawh in harsatna ka lo tawk tawh ṭhin, chuvangin Daria Saville rilru tur kha ka hriatthiam pui a, a pawi ka ti takzet," tiin a sawi.

Australian nula Saville hian 2013 khan a khupah bawk hliam na tak a lo tuar tawh, zai niin rei tak a lo chawlh phah tawh, season hmasa pawh kha hliam vang bawkin a lo buai tawh a, world ranking-ah pawh 627-naah a thla hniam hial.

Kum 28 mi Saville chuan, "Kum 2013 thil thleng kha ka hre chhuak, hun harsa ka tawh laia Osaka-i'n min hnem dan kha ka lawm, tun dinhmunah ṭha lo mah ila ṭha zawkin ka lo kir leh ang," tiin a sawi.