Korea Open-ah Raducanu a chak

Europe leh America lama tennis season vanglai a zo tawh a, kum tawp lamah Asia khawmualpui hmun hrang hrangah inelna neih mek a ni. Korea Open khelh laiah pawh Emma Raducanu a inlan a, a match hmasa berah Japanese nula Moyuka Uchijima chu 6-2, 6-4 in a hneh.

British tleirawl hian a match lehpekah chuan Belgian player Yanina Wickmayer a hmachhawn ang, season a hman ṭhat loh avangin atan Korea rama inelna neih hi insiamṭhat theihna remchang a ni ang.

US Open 2021 champion a nih avangin Raducanu hian hriat a hlawh, a hnu lamah erawh ropui takin a la khel leh lo. August thla mai kha chuan world number 10 a ni a, tunah erawh 77-naah a tlahniam dawrh tawh.

New York khawpuiah a nomawi a humhim theih loh avangin ranking point a neihsa a hum lo tihna a ni a, major tournament-ah champion hian point 2000 lai an hmuh theih avangin a nghawng a na hle.