Barca duo te khelh zatah Van Gaal a lawm lo

Netherlands coach Louis van Gaal chuan Barcelona-in Memphis Depay leh Frenkie de Jong te an khelh tamtir loh avanga a lawm loh thu a sawi chhuak. Oranje hian zanin dar 12:15 hian Poland an hmachhawn dawn. Nations League - League A group 4 inkhel dangah Belgium leh Wales te an inhmachhawn bawk ang.

Depay leh De Jong te hi Netherlands player pawimawh ni mah se Catalan club-ah an pawimawh pha tawk lo. Manchester United forward hlui Depay aiin manager Xavi-a'n Robert Lewandowski, Ousmane Dembele, Raphinha leh Ansu Fati te a dah sang zawk a, Dutch forward hian Ferran Torres a la tlukpha lo thei bawk. De Jong pawhin Gavi, Pedri leh Sergio Busquets te a tluk pha lo a, hmun nghet chang pha loin player thlak kual zinga mi a ni.

Barcelona manager hlui Van Gaal chuan, "Transfer window laiin player-ten ka bulah thurawn la nasa tih hi a dik a, chutihrualin thurawn ka pek zawh apiangin thutawp siamtu tur chu anmahni a nih thu a sawi. Ka player-te club khelhnaah ka lawm a, chutihrualin Frenkie leh Memphis te hi chuan khelhna hun chang tam thei se ka ti hle," tiin a sawi.

Catalan club tan Depay leh De Jong te hian khelhna hun chang tam lo mah se Netherlands-ah erawh hmun pawimawh an chan chhunzawm a rinawm. Orajne hmachhawn tur hi Barca striker ṭha mi Robert Lewandowski captain-na hnuaia khel Poland an ni. Van Gaal-a hote hian hnehna an chan a, Belgium-in point an hloh a nih chuan Netherlands hi playoff khel turin an tling ang.