Zanin Lammual pan hun Chanmari FC Vs Aizawl FC
Mizoram Premier League champion lai Chanmari FC-in nomawi humhim an tumna kawngah zanin dar 7:30 hian I League champion Aizawl FC an hmachhawn dawn. MPL awm hnua tualchhung football club record nei ṭha pahnih inkhel tur hi hmaih phal chi a ni lo.
One - one
Aizawl FC-in MFA Super Cup first round-ah Chanmari FC hi penalty shootout hmangin 3-2 in an hneh a, minute 90 chhungin goal a lut lo.
Portuguese coach Paulo Menezes awm hnuah team pahnih hi I Day Football semifinal-ah an intawng leh a, Mizo coach H. Vanlalthlanga enkawl Chanmari FC-in 2-1 in hnehna an chang.
Tun season-ah vawi khat ve ve an chak tawh a, zanin hi an vawi thum inkhelhna tur chiah a ni.
Whittemore-a telna
Chanmari FC-in Dinthar FC an hneh ṭuma goal khungtu Jakob Vanlalhlimpuia chu hrem vangin an chhawr thei dawn lo a, amaherawhchu Hnahthial tlangval hmun ruak luah khat tur hian Liberian striker Alex Whittemore an lalut.
Veteran coach Thlanga chuan, "Alex Whittemore hi chu a danglam," tiin chakpui tham player an neih thar thu a sawi. He player hi Dinthar FC an hneh ṭum khan an kawl tawh a, a transfer a fel loh vangin a khel thei lo a, zaninah chuan a khel thei tawh dawn.
AFC an fimkhur
Aizawl FC coach Paulo Menezes chuan, "Kan intawn hmasak ṭum khan chance ṭhahnem tak kan insiam a, keini aiin goal an khung tam zawk. An goal khungna kha set piece a ni a, dan theih tur a ni. Chutihrualin Chanmari FC kha an vanneih vanga chak an ni lo a, coach ṭha takin game awmze neiin a khelhtir vang a ni," tiin Vanglaini a hrilh.
An inkhelh tur chungchang sawi zuiin Portuguese coach chuan, "Kan intawn hmasak ṭum ai kha chuan kan inbuatsaihna a ṭha tawh zawk a, game pawh ṭha zawkin kan khel thei ang. Chutihrualin anni pawhin inpuahchahna an nei ṭha tho a, foreigner an neih thar avangin a harsa sawt bawk ang," tiin a sawi.
Aizawl FC-in an match hmasa berah Ramhlun North lakah point khat chauh an hmu a, an goal bawh a na tawk lo. Chanmari FC-in Dinthar FC lakah point thum an hu tawh a, an fimkhur a nih pawhin a mak lo ang.