Sept 19-ah Futsal League Playoff MFA-in a hnuaia player-te a humhalh

Mizoram Football Association chuan September 19 aṭang hian MFA Futsal League khel thei tur zawnna, MFA Futsal League Playoff an khel ṭan dawn. Team 25-in Playoff khel turin hming an pe lut a, team 16 tan chiah hmun ruak a awm. MFA Futsal League hi January, 2018-a khelh tur a ni.

FIFA, Asian Football Confederation (AFC) leh All India Football Federation (AIFF) duh dan angin MFA-in futsal a kalpui tawh dawn a, hei vang hian MFA Futsal Committee chuan player leh official-te inchinfelna hun ṭha a pe tawh a, tun chinah chuan ngaihdamna awm loin player thuawih lote chu a hrem tawh ang.

MFA Futsal Committee chuan Mizoram chhungah MFA ni lo futsal kalpui ve an awm thu leh, chutah chuan MFA/District FA hnuaia registered player ṭhenkhatte pawh an lo tel ṭhin thu a hria a, insiam remna hun rei tak a pe a, tunah chuan player leh official MFA hriatpui loh inelna danga inhnamhnawih a hriatte chungah hremna na tak a lekkawh tawh dawn.

Hei hian player chang ni loin official-te pawh a huam dawn a, MFA hian AIFF aṭanga hriattirna a dawn bawhzuiin AIFF lamin a registered players leh officials chu pawl danga an inziah luh a rem ti lo a, chuvangin hmun danga inziak lut registered player leh official-te chu AIFF thu angin a hrem dawn a ni.

MPL player hmun danga lo khel tawhte pawh season ṭan dawn khan koh an niin khel tawh lo tura intiamkamna an neih hnuah ngaihdam an ni. Tun chinah chuan MFA hriatpuina lo inelna danga tel chu District FA player zawng zawng pawh hrem an ni tawh ang a, DFA-a an registration pawh cancel theih a ni ang.