Police leh BVT ten point insem

Nimin tlai Mizoram Premier League Season 6 inkhelah Mizoram Police FC leh Bethlehem Vengthlang FC te 1-1 in an inhnehtawk.

Lammual inkhelah hian PC Laldinpuia hmangin minute 37-naah BVT-in hma an hruai a, Police-in F. Lalrinpuia freekick mawi tak hmangin second half-ah an sut a, goal dang a luh belh lo.

BVT-in an match hmasa berah Chanmari West hneh mah se Police lakah erawh team vannei zawk an ni.

Police tan captain V. Lalṭanpuia a rawn kir a, I League-a Aizawl FC champion puitu midfielder telna team an danglam. Ṭ-a thlawp tur atana dah F. Zosangliana'n game ṭha tak khel a, BVT keeper Lalruatpuia (Mama) man sual vanga goal ruaka a khung lo erawh a ui khawp ang.

Police-in an player pawimawh Lalfakzuala an chhawr lo chungin an goal nawr a na a, Republic Veng tlangval Valpuia'n ṭan phatah keeper Mama a fiah nghal a, hun tawp thlengin a BVT tlarhnung tan buaina tham a tling bawk. Team pahnihin chak tuma an khelh avangin goal chance a tam a, BVT midfielder Vanlalthanga'n 1-1 a nih laiin chance ṭha bik a hlah bawk.

Ṭialthawnga hoten Sept 14 tlaiah Chanmari FC an hma­chhawn ang a, September 15 tlaiah BVT-in Dinthar FC an tum ang.