Chanmari West-in Pressure nei dawn lo - Chhinga Veng coach
Vawiin tlai dar 3:00 hian Mizoram Premier League Season 6-ah Chanmari West leh Chhinga Veng te Lammualah an inkhel dawn.
Chhingcows hian MFA Super Cup nomawi chawi turin Chanmari West hi 5-0 in an sawp a, Malsawmfela'n hattrick a siam. Kar khat pawh a ral hmain I Day Football group stage-ah intawng lehin Chhinga Veng 5-1 in an chak nawn.
Chhinga Veng coach Lalsangzuala Hmar chuan, "Chanmari West tan mualpho dan tur a awm tawh loh avangin pressure nei loin an khel dawn a, keini tan zawk hian fimkhur a ṭul zawk ang," tiin Vanglaini a hrilh.
West Warrior fak zuiin Sanga chuan, "An defender thar Lalhlima kha a khel ṭha nghal a, an tlarhnung pawh a phui sawt ang. Chutiang bawkin Jacob-a pawh kan intawn hmasak ṭum ai chuan a ṭha tawh zawk. BVT lakah khan an vanduai a ni," tiin an inkhelh tawhna aṭanga thlir chi a ni loh thu a sawi.
Chanmari West hian MPL5 best defender H. Lalhlimpuia leh Shillong Lajong midfielder hlui Lalramluaha te an lalut a, an intawn hmasak ṭum ai chuan a ṭha tawh zawk.
West Warrior coach HC Zarzoliana chuan, "Kan inkhelh hmasak ṭum kha a mak khawp mai, insiamṭhat kan mamawh tih a lang a ni. Point la hmu lo kan nih avangin chak tumin kan khel dawn a, fimkhur erawh a ṭul ang," tiin a sawi.
Chhinga Veng hian hian coach Sanga kaihhruaina hnuaiah match 14 khel tawhin an la chak vek a, an record chhuanawm tak hi Chanmari West-in tihtawp an tum ang.