Roger Federer-a ngam loh Del Potro

"A na, tunah rih chuan tawrhthiam har tak a ni. Mahse, ka kum zat leh sesason ka hman chhoh dan ka chhut erawh chuan tuna ka chak lo hi ka tuar thiam, nakkinah chuan ka ṭha ve leh mai ang," tiin kum 36 mi Roger Federer chuan US Open quartefinal-a Juan Martin del Potro a hneh loh hnuah a sawi.

Nimin zing khan Arthur Ashe Stadium-ah Juan Martin del Potro chuan Federer lakah 7-5, 3-6, 7-6 (10-8), 6-4 a hnehna changin US Open semifinal a lut a, final hmain Rafael Nadal a hmachhawn leh ang. Nilaini zan khan Nadal hian darkar khat leh minute 37 chhung lekin rawlthar Andrey Rublev chu 6-1, 6-2, 6-2 in a hneh ve bawk.

Tennis tournament zinga sum tamna berah Nadal leh Federer te hi kuminah a vawi khat nan an inhmachhawn ngei dawn niin a lang hman. Mahse, Federer a chak loh leh tak si avangin US Open bikah chuan player ropui pahnihte hi an la intawng lo chhunzawm zel ta rih a ni.

Huaisen rah

Del Potro-a'n quarterfinal-ah set hnih a hloh zet hnuin Dominic Thiem a hneh let a, set nga a khelh aṭanga darkar 48 pawh a liam hmain Federer a hmachhawn zui leh nghal. Tun season-a player tawhkhirh ber Federer lakah Argentina tlangval hi a zam lo a, a service leh forehand na tak chu a hmanraw ṭha ber niin tun hma ang bawkin a dinchan pui.

Kum 28 mi Del Potro hian Federer hnehin kum 2009 khan US Open nomawi a chawi tawh a, kum riat a liam hnuah Arthur Ashe Stadium-ah ngei Federer bawk a hneh leh ta - a vawi hnih nan Grand Slam nomawi chawi thei dinhmunah a ding.

Seeded 24-na Del Potro chuan, "Tun tournament chhunga ka khelh ṭhat ber ṭum a ni. Ka service a ṭha a, ka duh vangin forehand ka hmang thei bawk. He hmunah hian ṭantu ka ngah em em a, Nadal nen kan inkhelh leh hunah pawh fans an ṭhat leh ngei ka beisei," tiin a sawi.

Nadal a tlang

Inelna boruak a sang tual tual a, world number 1 Nadal a khel ṭha tual tual. Spain tlangval hian Russian tlangval Rublev lakah a service vawi khat bak a hloh lo a, unforced error vawi 20 chiah neiin quarterfinal-ah hian tihsual vanga khingpuite point pe tlem ber a ni.

Kum 31 mi Nadal chuan, "Rawlthar ṭha tak tak an rawn chhuak zel hi a lawmawm, kei pawhin an dinhmun ang hi ka lo tawng ve tawh. Ka hmuh dan chuan Rublev hi player beisei awm ber pawl niin ka hria," a ti. Nadal hian a vawi 26 nan Grand Slam semifinal a khel dawn.

Grand Slam vawi 15 cham­pion tawh Nadal leh Del Potro te hi 2009 US Open semifinal-ah khan an lo intawng tawh a, Argentine tlangval Del Potro hian 6-2, 6-2, 6-2 in hnehna a chang a, final-ah Federer a hnehin nomawi a chawi zui bawk - seeded pakhatna Nadal hian hna hautak a hmachhawn ngei ang.