Mizoram Premier League - hman leh tun...

India international player chher chhuak a, Santosh Trophy leh I League champion chher chhuaktu Mizoram Premier League chuan kum ruk a lo tling ta. MPL6 kan thlir hmain MPL1-5 kha i thlir kir thuak teh ang.

Hmanlai hian maw...

Kum 2012 hma lam khan Mizoramin football league tia sawi tham a la nei lo. 'League' tih hmung pu chu kalpui ni tawh mah se, thla khat em pawh daih mang lo leh inbuatsaihna ṭha pawh nei mang loa khelh a ni hlawm.

Kum 2012 a ni a, MFA hruaitu thar an awm a, Zonet Cable TV lamin pawisa an thawh a, sum leh tha thawhtu mi ṭhahnemngaite zarah Mizoram Premier League a lo piang ta. Football awmze neia khelh a ni ṭan ta a, beisei phak bak result a hring chhuak mawlh mawlh mai.

Mizote talent neih ṭhatzia chu Mizo player vai rama football academy-a zir tawh phawt chu India tana khel phakin an chhuak deuh vek ṭhin khan a nemnghet. Mizoramah ngei football 'zirna' mai ni lo a khelha an khelhna MPL a lo piang a, footballer ṭha an lo chhuak ta.

Rah chin apiang ram

MPL a din hnuah Mizoramin football inelna an tel phaknaah champion nomawi an la kim tawh. Sub Junior hi chu Mizoram thiam bikna emaw tih turin kum 2003-a kawr sen hak aṭang khan an champion ṭan tawh a; nimahsela junior leh senior level hi an kai hleithei lo.

2013 a ni a, MPL Under 17-a player hlang deuhthaw telna Mizoram team chu a vawi khatna atan National Junior Championship-ah an champion - he champion team-a tel Jerry Mawi­hmingthanga, Malsawmzuala leh Lalṭhakima-te chu ISL khel tur an ni reng tawh a, I League-a khel eng emaw zat an awm bakah India junior team-ah an inlan nual bawk.

Kum 2014 a ni a, Santosh Trophy-ah Mizoram an champion nawlh mai. Tun hmaa semifinal pawh la khel ngai lo team ni si an han champion ta mai chuan India a barakhaih a, Indian media Santosh Trophy chanchin ziak tawh ngai mang lote pawhin an ziak chuai chuai mai.

2014 hi 'tihpalh' a ni lo tih nemnghet turin 2015 National Games-ah Mizo­ramin mipa football-ah gold medal an awrh thei tlat - a vawi khatna zel a ni. He mi kum vek hian Aizawl FC chu I League second division-ah champion-in I League khel turin an tling - a kalkawnga an elpui ber chu MPL club tho Chanmari FC an ni.

2016-ah I League team neiin che ṭha tawk lo mah se, tawnhriat an neih hnu 2017-ah meuh chuan Aizawl FC chu I League champion an ni ta.

Club leh state inelnaa Mizoram leh Mizoram club tel phaknaah chuan an champion kim ta tihna a ni.

Hei le MPL6 chu le...

'Kan ti nek neka 'ber thla kan thleng' kan tih rual hian, 'kan ti nek neka MPL6 kan thleng ta thut mai' chu a nih ber hi. Hman ni lawka Bhaichung Bhutia rawn kal khan MPL kha a 'kick off' kha a ni a; tunah Indian football leh football sumdawnna khawvela mi pawimawh Chirag Tanna chuan MPL6 a kick off ta - MPL mikhual pawh an hraw thei khawp mai.

MPL1-a inzir chawp club-te pawh an lo inzir fing tawh a, player thlan dan, hlawh siam dan leh an hmalam huna an kal zelna atan an inthlung fel chho ṭan. I League champion kan kawl a, a ṭhenin ISL an thlun zawm tawh a, club dangte pawh inenkawl dan a fel fai chho hle.

I League club leh sorkar club te, khawtlang mipui pawisa khawnin a din club-te ni nawk mah se, an zavai hian MPL nomawi inchuh an ni.

Aizawl FC
I Leagua champion Aizawl FC hian foreigner pahnih Alfred Jaryan leh Kareem Nurain-te an nei a, an foreigner dangte hi chu MPL-ah ziah luh an ni lo - October-ah an duh chuan foreigner hi an thlak thei ang a, pahnih bak an chhawr thei lo ang.
Portuguese coach Paulo Menezes leh a Spanish assistant coach Izan Martín-te hian Mizo footballer tawnhriat ngah S. Malsawmtluanga leh David Lalrinmuana an kawl a, rawlthar Rochharzela leh K. Lalṭhathanga-te bakah Fela Zote, Albert Zohmingmawia-te an la kawl tel a, Mizoram keeper ṭha Lalawmpuia leh Lalremruata duhtawk loin East Bengal aṭangin Avilash Paul an lalut bawk - team ṭha tak an ni.
Bethlehem Vengthlang FC
Season hmasa league stage-a point hmu sang ber BVT hian an player ṭhate chhuah deuh vek mah se position tinah player ṭhain an hnawh khat thei. Coach Chawngthansanga chakna hnar ber tur erawh chu veng mipuii an ni leh lo thei lo.
Defender chak Laldinpuia leh defender fing MS Dawngzela (Notea) an nei a, midfield hi an chakna niin K. Lalnunzama, B. Zoramthara, Lalnuntluanga leh Vanlalthanga-te inkawp hi an khawng ngei dawn a; tlar hmaah captain Lalrammawia'n a ho dawn bawk a, team tawh khirh tak an ni leh ngei ang.Khawtlang ṭanrualin an din a ni a, team ṭan turin an ṭang rual leh ang.
Chanmari FC
MPL champion lai Chanmari FC hian veteran coach H. Vanlal­thlanga hnuaiah rawlthar an lalut nual a, an innghahna tur erawh chu an player tawnhriat ngahte leh fans rinawmte an ni ngei ang - 'banner lian' nei veng ngat kha an ni a, team tichak thei tur zai leh au thiam an ni.
'Rawlthar rual' team anga sawi an rem lohna chu Mizo top player zinga chhiar theih keeper Lalmuanawma, defender Lalrosanga-te bakah Mizoram winger chak ber ber pahnih Vanlalbiaa Chhangte leh Lalmuanzova-te an kawl a, Shillong Lajong aṭangin Joseph Lalfakzuala leh Joe Zoherliana-te an lalut thei a, rawlthar chak ṭha Jacob Vanlalhlimpuia an nei bawk. An innghahna turin foreigner Alex Whittemore an ziak lut tawh bawk a, champion leh ngei an tum tih a nemnghet.
Chanmari West FC
MPL5 semi finalist hian tun season chu champion tumin player an lalut a, MPL2 lama an thawm rin ang bawka mipui lamin an ṭawiawm theih dawn chuan champion thei tur squad an nei ta.
Chanmari West hian tawnhriat nei player pahnih - MPL5 best defender Lalhlimpuia leh Mohun Bagan leh Shillong Lajong player hlui midfielder Lalramluaha-te an lalut. He mi hma hian coach HC Zarzoliana'n rawlthar duhawm Lalromawia thiamna min hmuhtir tawh a, Lajong chher chhuah Jacob Lalrawngbawla an nei a, captain Lalnunmawia an neih bakah foreigner-te pawh an sawi ri zuau zuau bawk - champion 'thar' nih an tum.

Chhinga Veng FC
Tun season an khelh tawha la chak fai vek Chhinga Veng FC hian tun season bikah players an nei
ṭha ber a, fans an nei ṭha ber bawk a, coaching staff ṭha ber an ni tih an nemngheh dawn chuan MPL6-a an champion a ngai.
CVFC hi an tumah an chiang a, chu chu 'cham­pion' a ni a, champion thei turin player an la khawm. Position tinah Mizoram player ṭha an nei. Coach Lalsangzuala Hmar hian Mizo top strikers - Malsawmfela, MS Dawngliana leh MPL5 top scorer Laldampuia a kawl a; Khawpuimawia leh Lalrammuanpuia hi sawi hmaih an thiang lo bawk. Chanmari FC captain kumhlun Lalrinchhana an la chhuak thei a, an champion lo a nih chuan MFA Super Cup leh I Day Football-a an champion-te hian an rilru nâ a chhawk zo lo ang.
Dinthar FC
Mizorama football club hlun leh MPL-a champion hmasa ber Dinthar FC hian champion nawmzia an tem tawh a, team chhe pawl nih hrehawmzia an 'tuar' tawh a, MPL6-ah champion tumin foreigner pahnih nen bul an ṭan.
Clarence Carter leh Jackson Victor-te hi team chakpui thei tur khawpa chak leh thiam an ni a, anni bakah hian Champhai defender ṭha pahnih - Malsawma Chhangte leh Lalnunpuia an kawl. Coach Lalhlupuia Sailo hian midfielder ball thiam H Malsawmtluanga leh Lalbiakhlua a neih bakah veteran Samuel Laltlanthanga a la nei tel bawk a; kum hnih vel player laka an insum deuh hnuah champion tumin player an lalut leh ta.
Mizoram Police FC
MPL club zinga sorkar enkawl awm chhun Mizoram Police FC hi division hniam aṭanga lo chho hlim an ni a, champion tur rinkai ni lo mahse team dang tana hlauhawm ni thei player an la kawl fur mai.
Mizo striker ṭha ni ṭhin Ṭialthawnga enkawl team-ah hian Mizoram team-a khel phak
ṭhiau - F Lalrinpuia, Lalbiakhlua, Lalfakzuala, Lalsangbera-te tlat hmaah an awm. Midfielder V. Lalṭanpuia leh defender Lalhmunmawia-te hi MPL team khawiah pawh khel thei tur khawpa ṭha an ni a; nimahsela 'team' anga an ṭhat rual loh avangin champion tura rinkai ber chu an ni lo.
Ramhlun North
MPL5 lama hmel thar Ramhlun North hian player ṭha nei loa MPL hmachhawn hautakzia season hmasa khan an tawng tawh a, tun season chu player na na na chu an nei chhe ta lo.
Coach thar Samson Ramengmawia hnuaia khel RNFC hian Mizo rawlthar duhawm Lallian­sanga (Notea) leh Lalramzauva an kawl a, an player pawimawh bera chhal theih erawh winger Lalrinfela a nih hmel - ball pet thiam Fela hi Mohun Bagan leh Churchill Brothers lamah pawh lo khel tawh a ni. Foreigner lamah an tluang lo a, an player chah luhte ṭhatna tak hi a la hriat loh a, anni hi champion leh champion loh hriltu an ni thei ang - fans aṭanga teh chuan a ṭha pawl an ni.