Mbappe-a'n a match hmasa ber khel dawn

Zanin dar 12:15 hian Paris Saint-Germain chu Ligue 1 match khel turin Metz khelmual Stade Saint-Symphorien-ah an lenglut dawn. PSG manager Unai Emery chuan a player thar Kylian Mbappe chu inkhel tura a inpeih tawh thu a sawi.

Kum 18 mi Mbappe hian nipui transfer tawp ni khan AS Monaco aṭangin PSG hi loan hmangin a zawm a, loan hun a zawh hunah a nghetin an lalut ang. PSG hian Mbappe bakah an player thar Neymar an chhawr thei dawn - Mbappe leh Neymar te hian striker Edinson Cavani an karcheh tura ngaih a ni.

PSG manager Emery chuan, "France tan a inlan thei a, kan hnenah training la nei tam lo mah se inkhel turin a inpeih. Ram tana a inkhel kha kan en a, a khel ṭha hle a ni," tiin a player thar chu chhawr a tum thu a sawi.

Sevilla manager hlui Emery chuan Mbappe chungchang sawi zawmin, "Tunah hian tlarhma lama kan player duh chu kan nei kim. Kylian nen hian inbiakna ken nei sa a, inkhelh tam duh a nih avangin khelh phak ngei a duh thu min hrilh. Striker atan a hman theih a, khelmual sir vei lam emaw ding lamah emaw a khel thei bawk ang," tiin a sawi.

Nilaini khan Mbappe hian thuthar thehdarhtute a kawm, a club thar chungchang sawiin, "Khawvel a club ropui berte zing­a tel phak ka zawm thei hi ka lawm. He hmunah hian player tawnhriat nei leh nomawi chawi hnem tawh an awm nual, an hnen aṭangin zir tur tam tak ka nei ang," a ti. Khawvel player manto ber Neymar nena khelh dun a châk tawh thu a sawi tel bawk.

France international hian season hmasa khan AS Monaco tan inelna hrang hrangah match 60 khelin goal 27 a khung. Kumin February thla khan Metz nen an intawn ṭumin Mbappe hian hattrick siamiin a club chu 5-0 in hnehna a chan pui - Emery tan Metz hmachhawn tura thlan itawm tak tur chu a ni.

PSG hian Mbappe leh Neymar an lakluh hma hian Cavani bakah Marco Verratti, Marquinhos, Julian Draxler leh Angel Di Maria te an neih sa bawk, an hming en mai chuan European club zingah anni aia hmatawng nei ṭha tur an awm rih bik lo ang - khawvel huapa player ṭha ni phak remkhawm thiam chu Spanish manager mawhphurhna a ni tawh ang.

Kum 45 mi Emery chuan sawi zawmin, "Player langsar ṭhenkhat ten hmun dang pan aiin Paris-a cham an thlang, an thutluknaiin chiang taka a tarlan chu he hmunah hian hmasawnna hmuh an beisei a ni," tiin a sawi.

Argentina in­ternational Di Maria hi a malpui na vangin a chawlh rih a ngai dawn a, hrem vangin Verratti an la chhawr thei dawn lo bawk. South American player ṭhenkhat chuan training an zawm tlai avangin zanin hian an inlan thei lo mai thei bawk. Confederation Cup khelh avanga team zawm tlaitu Draxler chu inkhel turin a inpeih tawh. January thla a PSG zawmtu Germany international Draxler hian tun season-ah minute 13 vel bak a club tan a la inlan lo.

PSG hian season hmasa khan Monaco lakah an league nomawi kawl lai an chan a, kuminah lak let tumin season bul an ṭan fuh hle. Emery naute hian match li an khelh tawhah hnehna an chang fai vek a, an elpui Monaco nen point 12 ve ve an hmu. Zanina an hmachhawn tur Metz erawh club 20 zinga point la hmu lo awmchhun niin table mawngphah an awm - PSG hi harsa lutuk loa chak tura ngaih an ni, chutih rualin international match zawh chiah hian club lian ṭhenkhat chu club te zawk lakah an buai ve fo bawk.