Ram parsarihin Russia panna tur ticket nei tawh

FIFA World Cup 2017 chu nakkum nipui lai hian Russia ramah khelh a ni dawn. The Grea­test Show on Earth tia an sawi

ṭhin ram leh ram football hmanga inelna lian hmachhawn tur hian a thlengtu ram chu tling sa an ni a, anni bakah hian ram pasarih te chu an inpetling tawh bawk.

World champion vawi nga ni tawh Brazil chu South America aṭanga inpet tling thei hmasa ber an ni. Europe aṭangin Belgium chiah an la inpet tling thei a, North America ram zingah Mexico tling tawhin Asia ram aṭangin pali - Iran, Saudi Arabia, Japan leh South Korea ten Russia panna ticket an nei tawh bawk.

Russia

Stanislav Cherchesov-a kaih­hruai Russia hi a thlengtu an nih avangin qualifier an khelh ve a ngai lo. World Cup inbuatsaihna pakhat atan August thla khan Confederations Cup an thleng a, beisei an phak lo. Group match hmasa berah New Zealand hneh mah se Mexico leh Portugal an hneh loh avangin knockout round an lut phak lo.

Russia hian World Cup an vawi thum khelhna tur a ni a, South Africa ang maia World Cup thlengtu zinga group stage paltlang zo lo nih an duh loh chuan ram tana match 100 chuang khel tawh veteran goalkeeper Igor Akinfeev-a hoin infuih phur ṭhat an mamawh khawp ang.

Belgium

Europe ram zinga inpet tling hmasa ber chu Belgium an ni. Red Devils hian a zawna vawi hnih World Cup an khelh phak loh hnuah kum 2014 khan Brazil-ah khel ve lehin quarterfinal an inhlang kai hial a, Russia pan tur hian Bosnia-Herzegovina leh Greece te khelh hmabak nei chungin an tling thei a ni.

Belgium hian kum 1986 World Cup khan palina dinhmun an luah tawh a, hei hi an tawn san ber

ṭum a ni. Tun dinhmunah Roberto Martinez-a chhawr theih turin Premier League player - Eden Hazard, Kevin de Bruyne, Romelu Lukaku, Moussa Dembele, Marouane Fellaini leh Christian Benteke te an awm avangin beisei an nei sang khawp ang.

Brazil

Kum 1958, 1962, 1970, 1994 leh 2002 khan Brazil hi world champion an ni a, mahse an ramin inelna lian an thlen ṭumin semifinal-ah Germany 7-1 ngawtin an ngam lo a, an khelmualah zahna leh lung­ngaihna mittui a luang.

World champion vawi nga ni tawh Brazil hian coach Dunga thlakin Tite kaihhruaina hnuaiah harhtharna an chang a, South America ram 10 inel zingah pakhatna niiin March thla khan an in pet tling der tawh - Russia pan tur inpet kai thei hmasa ber an ni. Pound makataduai 200 man Neymar-a'n Ballon d'Or chawimawina dawng turin world champion nih a tum ruh dawn.

Mexico

North America, Central leh Caribbean inel zing aṭangin Mexico chuan hneh loh nei loin Russia kal turin an tling a, match hnih khelh tur an la nei bawk. Juan Carlos Osorio enkawl Mexico tan PSV Eindhoven winger Hirving Lozano chu player pawimawh a ni mek. Kum 22 mi Lozano hian an match hnuhnung pathumah goal thum a khung a, sikhat faia Panama an hnehna goal kha a khung a ni.

Manchester City assistant manager Juan Carlos Osorio chuan, "World Cup khel tura kan tling hi kan tan chawimawina a ni tawh a, tunah chuan zirlai hautak kan zir chhunzawm leh nghal dawn a ni. Football inelna lian leh ropui a inṭan dawn," tiin a sawi.

Iran

Real Madrid manager hlui Carlos Queiroz chuan, "An nun atan an bei a, an ram football chanchin ziak danglam tur leh an hmingṭhat nan an bei a ni," tiin Iran team chungchang a sawi. Iran boss Queiroz-a naute hian match 12 chhung zet goal chhuah loa an kal theih avangin Russia an pan tur hi a mak lo.

Iran hian World Cup an vawi nga khelhna tur a ni a, sulhnu

ṭha sawi tur an la hnutchhiah lo. Kum 1998 World Cup France-in an thlen ṭum khan United States 2-1 in an hneh a, hemi ṭum bak hi chak ni hmel an la hmu miah lo a ni. Spanish club lian Real bakah Sporting Lisbon, South Africa leh Manchester United lama sulhnu nei tawh Queiroz hian chhuan tham sulhnu hnutchhiah a tum ang.

South Korea

Japan nena inthlen ṭawmin South Korea hian 2002 World Cup an thleng a, semifinal hial an thleng phak. Tun ṭum qualifier-ah hian vawi li hnehna changin match 10-ah goal 11 chiah khung mah se an chungah Iran chiah an awm avangin Ki Sung-yueng (Swansea) leh Son Heung-min (Tottenham) te awmna ram hi an tling.

Asia ram bikah chuan South Korea aia World Cup chanchin sawi tur ngah an awm bik lo. Coach Son Heung-min kaihhruaina hnuaia khel ram hian vawi 10 an khelhna tur a ni a, tun hnaiah a zawnin vawi kua ngawt an inpet tling thei bawk.

Japan

AC Milan playmaker hlui Keisuke Honda leh Borussia Dortmund midfielder Shinji Kagawa te awmna Japan hian Australia 2-0 a hneh chungin Russia panna ticket an nei a, Samurai Blue hian kum 1998 chinah World Cup an la khel kim vek dawn tihna a ni.

Japan hian Brazil-ah beisei an phak lo tawh a, hei bakah Asian Cup nomawi an hloh zui bawk. Mahse, football thiam ram an nih zia lantir turin Leicester forward Shinji Okazaki leh Arsene Wenger-a'n theihna sang tak nei tia a sawi tawh Takuma Asano te awmna ram hian inrintawkna an nei leh tawh.

Saudi Arabia

Kum 2002 World Cup khan Saudi Arabia hi Germany lakah 8-0 in an tlawm. Khawvel hmuha an mualphona hliah khuh tumin league ṭha tak an din chho a, player ṭha chher chhuak chhoin kum 2006 hnua a vawi khat nan World Cup an khel ve leh dawn.

Asian Player of the Year 2014 dawngtu veteran striker Nasser Al Shamrani a la khelh theih a beiseiawm a, football khawmpui lianah hian a vawi hnih nan chak an beisei dawn. Kum 2010 World Cup final-a Netherlands hruai thlengtu coach Bert van Marwijk hnen aṭangin zirchhuah tur tam tak an hmu thei ang.