Venus Williams tawpna semifinal US Open-ah champion thar awm dawn
US Open hmeichhe champion thar kan hmu dawn. Nimin zing khan hmeichhe singles semifinal khelh niin Venus Williams chu Sloane Stephens lakah a chak lo a, inkhel lehlamah Madison Keys chuan Coco Vandeweghe hnehin final a lut ve bawk. Zanin dar 1:30 hian Arthur Ashe Stadium-ah nomawi inchuhna neih zui nghal tur a ni.
Flushing Meadows, New York-a inkhelah seeded pawh chang phak lo Stephens hian darkar hnih leh minute sarih chhungin 6-1, 0-6, 7-5 in hnehna a chang. Semifinal lehlamah seeded 15-na Keys chuan harsa lo takin Coco lakah 6-1, 6-2 in hnehna a chang ve bawk.
World number 83 Stephens tan tun ṭum hi Grand Slam semifinal a vawi khat khelhna a ni a, nomawi inchuhnaa a hmachhawn tur Keys nen US Open final an vawi khat khelhna tur a ni ang. Hmeichhe singles semifinalist palite hi American nula vek an ni a, khawtual nulain nomawi an chawi dawn tihna a ni.
Kum 2002 Flushing Meadows-ah hian Venus Williams leh Serena Williams ten final an khel tawh a, Williams unaua a naupang zawk Serena-i'n hnehna a chang. Williams unau an inhmachhawn hnuah kumin hi American nula pahnih ten nomawi an inchuh lehna hmasa ber tur a ni ang.
Venus a chuai
Kum 37 mi Venus-i'n kuminah season a hmang ṭha chho hle a, Australian Open leh Wimbledon final a thleng hial. Inlena lian pahnihah hian champion lo zawkah ṭang mah se US Open bikah chuan beisei a nei sang hle. A tan chuan Grand Slam semifinal vawi 23-na a ni a, a khingpui Stephens tan erawh a vawi khatna chauh a ni thung.
Mahse, rinkai Venus hian tihsual a ngah hle a, a tawpah a tuar. Unforced errors vawi 51 zet a neih laiin a khingpui hian ṭum 27 chiah a nei a, hnehsawh takin set hnihna la mah se set khatna leh set hnuhnung berah a hnufual zawk avangin a zinkawng a tawp.
American nula Stephens hi a khup na vangin kut khat deuh thaw a inkhel thei lo, July thla kha chuan world number 957-na daih a ni. A hliam a dam hnuah erawh court chhunga player hmuhnawm berte zinga mi niin match 16 a khelhah ṭum 14 hnehna a chang a - US Open final hial a thleng thei leh ta a ni.
Kum 24 mi Stephens chuan, "Semifinal-ah US nula pali ngawt kan awm khan ka hlim tawk tawh viau a, kan ramin hmeichhe tennis kan thunun thei a nih tih ka hriat avangin ka lawm hle. US Open bika player tawnhriat nei ṭha berte zinga mi ka hneh theih avangin inrintawkna ka neih phah sawt," tiin a sawi.
Keys a tlang
Williams unau tih lohah chuan Lindsay Davenport (1998) kha khawtual nula zinga US Open nomawi chawi thei hnuhnung ber a ni. Tunah chuan Davenport hi coach a ni tawh a, a kaihhruaina hnuaia khel mek Keys hian a sulhnu zui theihna tur hun remchang a nei mek.
Kum 22 mi Keys chuan, "Ka duhthusam ang thlapin khel thei lo mah ila ka khelh danah ka lungawi tawk a, tihsual nei tlem zel turin ka fimkhur chhunzawm ang. Nomawi inchuh tur kan ni a, a vannei zawk zawk kuatah a awm ang. Chutih rualin vanneihna tawng baw tur chuan thawhrimna leh huaisenna a ngai a ni," a ti.
American nula Keys hian player awm khauh zawkte angin ball vaw na em em hran lo mah se tihsual a nei tlem thei hle. Semifinal-a Vandeweghe a hneh ṭum pawh hian winners vawi 25 vuaiin unforced erros vawi kua chiah a nei thung. Venus (51) nena khaikhin chuan Keys hian a tisual thei lo ang mai a ni.
Mipa semifinal
Nizan zanlai leh tukin zing khan khan mipa semifinal khelh a ni a, Grand Slam vawi 15 champion tawh Rafael Nadal leh Juan Martin del Potro te inhmachhawnin semifinal lehlamah Kevin Anderson leh Pablo Carreno Busta te an inkhel a, he thu buatsaih lai hian result kan hre hman lo. Final hi Pathianni zana khelh tur a ni.