En bik tur Drinkwater
Chelsea-in transfer tawp niah Leicester City aṭangin Danny Drinkwater an lalut a, Premier League champion hian zanin dar 7:30 hian Foxes hmachhawn turin King Power Stadium-ah an lenglut dawn.
English midfielder Drinkwater hian khelhna hmun a chang a nih chuan French midfielder N'Golo Kante kawppui a ni ang a, a luh ruala Chelsea zawmtu Davide Zappacosta-a'n khelhna hmun chang turin right wing back Victor Moses a chuh pui ang.
Leicester City-in kum 26 mi Aleksandar Dragovic chu Bayer Leverkusen aṭangin loan hmangin an hawh. Foxes hian Robert Huth la chhawr thei lo mah se defence laiah Harry Maguire leh Wes Morgan te an la inkawp fuh avangin Austria defender Dragovic-a'n khelhna hmun a chan nghal mai a rinawm loh. Tute pawh lut se Chelsea striker Alvaro Morata chu Spain tana a khelh ṭhat chhunzawm avangin an hna a hau tak khawp ang.