Chhinga Veng an kal fawr zel
Nimin Mizoram Premier League Season 6 inkhelah Chhinga Vengin Vanlallawma, R. Malsawmtluanga leh Malsawmfela te goal hmangin Chanmari West 3-0 in an hneh.
Lalsangzuala Hmar kaihhruaina hnuaiah Chhingcows hian MFA Super Cup leh I Day Football nomawi an chawi tawh a, match 15 khel tawhin an la chak vek.
A goal lo
Chanmari West FC starting eleven-ah MPL5 best defender H. Lalhlimpuia leh Shillong Lajong midfielder hlui Lalramluaha te an inlan a, mualpho nawn an tum lo.
Amaherawhchu, ṭhan phat aṭangin Chhingcows goal nawr a na a, MS Dawngliana aia lut Lawma'n goal chance ṭha a hlah a, Laldampuia leh Sawmfela te goal hmaah an vannei tawk lo.
West Warrior an hnufual bik lo a, Lalnunmawia'n a lu hmanga tauh luh theihna tur ṭum hnih a hlah. Lallianzama'n Chhinga Veng player ball inpe kual lai chhuhsakin an vaw let a, Zobawk tlangval Lianzama'n amah thlawptu Mawitea tan ball a pe uluk tawk lo a, an chance ṭha neih chu Lalremruata'n a tawp kharin goal khung theihna tur chu engmah loah an chhuah.
Goal thum
Chanmari West minute 53-naah an chesual a, an tho tawh lo. Left back Calvin Zosiamliana'n goalkeeper Vanlalhriata pe letin keeper hian Lalkhawpuimawia (Mapuia) zawnah bak a pet thei lo. Kelkang tlangval Mapuia'n box chhunga vengtu nei lo Lawma a pe a, Khawzawl tlangval hian harsatna nei loin a khung.
West Warrior tlarhnung an muthlu zui a, minute 63-naa Sawmfela ball vawrh luh chu MS-a'n a tlawh lut a, keeper Hriata leh defender ten an hna an thawk lo.
Minute li hnuah Sawmfela'n striker ṭha bik a ni tih pholangin thui tak a tlan pui hnuah box pawn
aṭangin goal kilah tak a khung.
A chung berah
Chhinga Vengin MFA Super Cup leh I Day Football angin Chanmari West lakah goal nga an khung nawn lo a, amaherawhchu goal thum an khung tho avangin an lungawi ang.
Lalsangzuala Hmar tana thu lawmawm chu match sarih chhung a zawna goal an chhuah ziah hnuah goal an chhuah lo a, MPL6 match hnih khelhah chak ve vein a chung berah an awm bawk.
ZoFooty Statistics
Chanmari West 0 - 3 Chhinga Veng
CVFC : Vanlallawma 53'; R. Malsawmtluanga 63';
Malsawmfela 67'
MoM : R. Malsawmtluanga, CVFC
47% Ball Posssession 52%
9 (1) Shots (On Target) 18 (11)
1 Yellow Card(s) 0
0 Red Card 0
Powered by Rainbow Multibrand Mobile Showroom
# Team Pld W D L GF GA GD Pts
1 Chhinga Veng 2 2 0 0 7 1 6 6
2 Bethlehem VT 2 1 1 0 3 2 1 4
3 Chanmari FC 1 1 0 0 1 0 1 3
4 Aizawl FC 1 0 1 0 1 1 0 1
5 Ramhlun North 1 0 1 0 1 1 0 1
6 Mizoram Police 2 0 1 1 2 5 -3 1
7 Dinthar FC 1 0 0 1 0 1 -1 0
8 Chanmari West 2 0 0 2 1 5 -4 0