Pep-a khawpuiah Klopp-a Reds lenglut dawn

Tunkar tawp Premier League inkhel ngaihven hlawh ber chu vawiin tlai dar 5:00 hian Etihad Stadium-ah khelh a ni dawn. Khawvela manager hlawh tam ber Pep Guardiola enkawl Manchester City chuan Liverpool an mikhual dawn a ni.

Tlarhnung rem phui tum vanga sum hmang hnem Man City hian Arsenal lakah goal li khung thei Liverpool lakah fiahna an hmachhawn dawn a, game rang khel ṭhin Jurgen Klopp-a hote leh passing game khel Pep-a naute inkhel a hmuhnawm ang.

Fiahna

Nipui transfer-ah Man City hian pound maktaduai 226 zet an hmang a, an sum hman zinga maktaduai 158.2 chu defender pathum Kyle Walker, Danilo leh Benjamin Mendy te lakluh nan a ni. Pep hian tlarhnung laiah Vincent Kompany, John Stones leh Nicolas Otamendi te a nei sa a, Walker leh Mendy te hi wing back an ni.

City hian Everton lakah an goal an veng him thei lo a, hun tawp dawna Bournemouth an hneh hram ṭum pawhin goal an chhuah tho. Reds hian hmatawngah Sadio Mane bakah Mohamed Salah leh Roberto Firmino te an rawn din tlartir leh ngeiin a rinawm a, player pathum hian goal an sual chhuak lo a nih pawhin City tlarhnung tana buaipui tham tak vek an ni ang.

City khelh dan

Spanish manager Guardiola hian Barcelona a enkawl khan ball rang tak taka inpek kualtirin attacking game hmuhnawm an khel, Catalan club lama a tih ang deuh hian Bayern Munich pawh a khelhtir thei. Mahse, season hmasa khan City a hlawhchham pui thung.

City hmatawng Sergio Aguero leh Gabriel Jesus te hi ball kang ai chuan leihrulah an hlauhawm zawk a, Pep-a hnuaia hlawhtling thei tur an ni. Amaherawhchu Argentine forward Sergio hi Spanish manager hnuaiah a tla tlum lo a, Gabriel Jesus lah tharum hman tamna Premier League-ah a la inbeng bel tawk lo. Forward ṭha pahnih hi World Cup qualifier khela South America lamah an haw avangin an hahdamtir thei a, chutihrualin Pep hian thlakna tur ṭha a neih loh avangin pakhat zawk hi chu loh theih loin a chhawr a rinawm zawk.

Coutinho-a training

Philippe Coutinho-a'n a hnung­zâng na vangin tun sea­son-ah Liverpool tan match a la khel lo a, hliam vanga a chawl nia sawi a nih laiin Brazil international hi ram tan harsatna nei loin a inkhel thei leh lawi si. Kum 25 mi Coutinho hian Ningani khan Reds training a zawm leh tawh a, City lakah mamawh dan a zira chhawr theih a ni tawh ang.

A player duhlai chungchang sawiin Liverpool boss Klopp chuan, "Mitinin a chanchin an ngaihven tih ka hria, kan match hmasa lamah khan hliam a neih vanga chhawr lo kan ni. Tunah chuan a hliam a dam tawh a, kan hnenah hlim takin training a nei leh thei tawh, player ṭha tak a nih avangin chhawr theih hmasak berah kan hmang nghal ang," tiin a sawi a, City nen a inpeih tawh tih erawh a sawi lang lo.

Nipui bazarah khan Barce­lona-in Coutinho hi lakluh tumin Liverpool an dawr a, Coutinho hian chhuah a duh thu thlen mah se Reds lamin chhuah an phal lo a, Barcelona a zawm theih loh hnuah a mittui a tla hiala sawi a ni. Liverpool fans ruhkawl rual Kop lamin Reds kawr aia Barca kawr ha châk hi engtin nge an chhawnchhaih dawn tih chu kan hre thuai ang.