Lammualah mipui thawm a ring Samson-a hnuaiah Ramhlun North an chak

Ramhlun North-in Mizoram Premier League Season 6-ah result ṭha duhin coach atan Samson Ramengmawia an lalut a, an match hmasa bera I League champion Aizawl FC an draw hnuah Ningani zan khan MPL-a champion hmasa ber Dinthar FC chu 2-1 in an hneh.

MPL6 match awm tawh a zawnga game nung berah Dinthar FC-in R. Lalthantluanga (Lalmama) hmangin minute 15-naah hma hruai mah se Maimawms captain Malsawma Chhangte-in minute 41-naah an lamah a tauh lut a, minute 58-naah Rosangliana'n Ramhlun North chakna goal a khung.

Inkhel nung

Dinthar FC-in an match hmasa berah Chanmari FC an hneh lo a, hemi ṭum hian Zothanzuala leh Nigerian forward Jackson Victor te chu hnawhchhuah an ni.

MFA disciplinary committee-in video replay hmanga thil thlen dan a en let hnuah Jackson-a hremna sut a ni a, Nigerian forward hian Ramhlun North a hmachhawn.

Maimawms-in nung takin inkhel bul an ṭan a, Dinthar tlangval Samuel Laltlanthanga cross ball chu Lalmama'n tauh lutin Dinthar mipui an au.

Lalhlupuia Sailo kaihhruai Dinthar FC-in Nigerian midfielder Clarence Carter hmangin in­khel an thunun a, goal chance pawh an ngah amaherawhchu Khawlailung tlangval Lalmama, Jackson leh Samuel ten goal dang an khung belh thei lo.

First half tawp lamah Ramhun North an insiam rem a, halfway thlen hma aṭanga captain C. Ramdinmawia freekick pet chu Dinthar defender Malsawma'n goal kilah tak a tauh lut a, Dinthar FC-in an inthlah dul rah an seng.

Second half-ah Ramhlun North an phur zui a, Lalrinfela freekick pet chu Dinthar keeper Malsawmdawngzela'n man mai loin a hnek chhuak a, ball tauh tuma tlan lut RS-a a hnek per avangin Ramhlun North midfielder aṭanga ball per chu goal ruakah a lut.

Hun tawp lamah Dinthar FC an chungnung nawn a, substitute Lalbiakhlua'n defender a bum vek hnuah crossbar a pet per a, Ramhlun North an him. Maimawms-in match hnih khelh aṭangin point an la hmu lo a, Ramhlun North erawhin point li an hmu tawh thung.

Boruak a sang

Dinthar FC-in chak beiseiin bul an ṭan a, goal hnih an chhuah hnuah insum theihna an tlachham. Maimawms right back Stephen Lalnunmawia'n ball awm loh hnuah a ke a thawh avangin yellow card pek a ni a, hemi hnu hian ṭum hnih hnawhchhuah theihna tur a pumpelh.

Maimawms midfielder Joseph Lalṭhafela'n tharum thawh tum a a lan avangin yellow card a hmu a, red card a hmu lo a vannei hle.

Dinthar FC-in vawi hnih an khelh tawh aṭangin team ṭha tak an ni tih an pholang mah se point an la hmu lo. Hei hi an rilru put hmang dik tawk loh vangah a ngaih theih a, insiam ṭhat an mamawh hle.

Mipui thawm a ṭha

Dinthar FC dinhmun ṭhat laiin an ṭantute thawm a ring a, Ramhlun North-in ṭantu an nei ve lo emaw tih mai tur a ni. Amaherawhchu, Ramhlun North-in goal an neih hnuah

ṭantu an ngah tih a lang a, inkhel boruak a nung sawt bawk.

Hun tawp lamah khelmual chhung boruak a ṭan ang chiahin khelmual pawn lam thawm a ṭha a, MPL6 inkhel boruak a nung chho zel ang.

Samson-a lawm

Ramhlun North coach Sam­son chuan, "Darkar chanve chhung kha chu kan talbuai a, insiamṭhat nan hun kan mamawh rei hle. Amaherawhchu minute 90 chhung thlir chuan chak phu zawk kan ni a, hun tawpa min rawn nawr bet kha chu inkhel kalphung ve reng a ni," tiin Vanglaini a hrilh.

Zo United coach hlui Sam­son-a chuan, "Tihsual kan la ngah a, inzirna tur la tam hle. Chutihrualin ka naute inpekna a ropui ka ti a, point thum kan hlawh chhuak hi ka lawm a ni," tiin a sawi.