Dembele kha Barca zawm turin ka hrilh - Mbappe

France international striker Kylian Mbappe chuan ram tana a khelh pui Ousmane Dembele chu Barcelona zawm tura thurawn a pek thu a sawi chhuak.

Barcelona hian forward Ney­mar chu khawvel player manto ber ni turin Paris Saint-Germain hnenah pound maktaduai 200-in an hralh a, Catalan club hian Brazil captain hmunruak hnawh khah nan Borussia Dortmund aṭangin pound maktaduai 97-in Dembele an lalut thung - kum 20 mi Dembele hian zanin dar 12:15 hian Espanyol lakah a club thar tana a match hmasa ber a khel tura beisei a ni.

PSG hmatawng Mbappe chuan, "Transfer chungchang kan sawi dun a, ka ngaihdan te pawh min zawt. Kei chuan Lionel Messi leh Luis Suarz te bula a khelh chu a tan hmasawnna tur ṭha tak a nih thu leh Barca zawm chu a fuh ka rin thu ka hrilh a ni. Tunah hian theihna sang tak a nei tawh nachungin a la tipung thei a ni," tiin a sawi.

Barcelona hian season hmasa khan Real Madrid lakah La Liga nomawi an chan a, Champions League lamah an hmelma leh elpui Real hian hlawhtlinna an chan laiin Catalan club hian semifinal an paltlang thei lo. Coach thar Ernesto Valverde hian Neymar awm loh hnuah engtiangin nge team a siksawi dawn tih chu a lang chho ang.

Spain champion Real Madrid chuan vawiin tlai dar 4:30 hian Santiago Bernabeu-ah Levante an lo mikhual dawn thung a, manager Zinedine Zidane chuan a naute chu club dang zawng zawng aia inpekna nei thuk turin a duh.

Real Madrid manager Zidane chuan, "Ka team-ah player ṭha fal tam tak ka nei a, ka duh ber chu club dang player zawng aiin Real tan hian inpekna an nei sang tur a ni. Barcelona player-te hi an club tana an inpek zawh em avangin fak an hlawh ṭhin, anni aia inpekna sang zawk hi ka duh a ni," tiin a player-te chu club hmangaih turin a duh.