Player rinawm vangin Jardim a lawm

AS Monaco manager Leonardo Jardim chuan a player ṭhenkhatin club chhuah san mah se rinawm taka awm tlatte chuan a tih lawm thu a sawi chhuak.

French Ligue 1 champion lai Monaco hian season hmasa khan Paris Saint-Germain khumin league nomawi an chawi a, an player pawimawh Kylian Mbappe, Benjamin Mendy, Bernardo Silva leh Tiemoue Bakayoko ten club thar an zawm san laiin Thomas Lemar leh Fabinho te erawh rinawm takin an awm tlang.

Monaco manager Jardim chuan, "Club lian tak takin kan player an duh a, lakluh tumin dilna kan dawng hnem hle bawk. He thil thleng hian Monaco hi a ṭhang a ni tih a lantir. Player chuak tate kha kan dem ngawt thei bik lo a, chutih rualin sum ṭhahnem taka sawm chhuah theih loh khawpa rinawm player kan nei hi ka lawm hle," tiin Lemar leh Fabinho te a fak.

Monaco hian Montenegro striker Stevan Jovetic leh Senegal forward Keita Balde te chu Serie A club Inter Milan leh Lazio aṭangin an lalut a, season hmasaa an ropuina humhim turin bul an ṭan fuh hle. Radamel Falcao khelhna club hian league match liah hnehna an la chang fai vek a, zanin dar 8:30 hian Nice an lenchilh leh ang.