Bayern tan James a inlan theih beiseiawm

Bayern Munich-in Real Madrid aṭanga loan hmanga an lakluh James Rodriguez chuan zanin dar 10:00 hian Hoffenheim lakah a club thar tana league match hmasa ber a khel thei tura beisei a ni.

Colombia international hi August thlatir khan a malpui a hliam a, ram tan harsatna nei loa a inkhelh theih tawh vangin club tan pawh a inlan zui ngei a rinawm hle.

German champion Bayern hian position hrang hrangah player langsar an nei nachungin tuna an buaina chu left back a ni. David Alaba chu an ram Austria tana a inlanna lamah hliam vangin thlak a ngai a, kum 24 mi Juan Bernat pawh hliam vangin a chawl mek bawk.

Season hmasa khan Bayern hi league-ah vawi khat chiah chak loh an nei, an hneh loh chhun hi league-a palina Hoffenheim an ni. Carlo Ancelotti naute hian April thla maia an chetsualna hmunah chetsual nawn duh loin Hoffenheim player pawimawh Sebastian Rudy leh Niklas Sule te an chhuhsak a, zaninah danglamna a awm em tih a hriat ang.