Lung ti lengtu Leeds United kha

Mizo football ngainatu zingah 'Elland Road' sawi rik ruala lungleng em em hi awm theih a ni a, chutianga Leeds zunzamin a lo tuam tawhte chuan mitthlain player duhawm tak takte kha hmuh loh theih an ni lo. 

Tlarhma lama striker duhawm tak Alan Smith kha Mizo nulate 'star' rawn a ni a, mahni room banga Alan Smith thlalak tar ṭhin eng zat tak awm che u maw?

Tleirawl chhuaktir zingah pawh pencil leh pen dahna school 'box'-ah khan thlalak lian lem lo tak tar kan awm nual a ni lawm ni? Leeds zunzam kha chu na deuh a sin!

Ian Harte, Jonathan Woodgate, Olivier Dacourt, Rio Ferdinand, Lee Bowyer, Harry Kewell, Mark Viduka leh Robbie Keane-te ṭhat chhoh lai kha a ni a, lung an ti leng lo thei lo. 

Mahse, kha team - 2000-01 Champions League semifinal hial thleng kha sum lamah an talbuai zui a, kum thum hnuah Premier League aṭangin an relegate a, tun thlengin kan hmu zui ta lo. 

September 19, 2000 kuma Elland Road ruahsur kara inkhel kha in la mitthla thei em? Leeds United-in a hunlaia team ropui AC Milan an hneh ṭum kha!

Leeds United hian group stage-a an match hmasa berah Barcelona an lenchilh a, Nou Camp-ah 4-0 ngawtin an mualpho. Tuman an dem lo - he team hian Patrick Kluivert, Marc Overmars leh Rivaldo te ho an kawl a, rawlthar tuaitir Leeds tan an u hret a ni. 

Mi tam tak thinlunga zawhna awm zawk chu Leeds hi eng ang takin nge an mualpho zui ang? tih chu a ni a, an group-a team dang la awm hi AC Milan leh Besiktas an ni tlat. 

Mahse, ni e, mahse - mak tak maiin Leeds hian an match hnihnaah Milan chu minute 88-naa Bowyer-a goal khung hmangin 1-0 in an hneh a, Milan goalkeeper Dida-a'n a kut a phar sei thlawn. 

Elland road-a ruah sur hnuaiah fans an lam a, player-te tlankhawm chungin an inkuah a, 'ropui' tih hian chutihlaia thil thleng chu a hrilhfiah zo kher lo ang. 

Hetihlaia Leeds coach David O'Leary chuan, "Khawpui pumpui khan chak an lawm a ni. Kha hun thleng tur kha nghakhlel takin an thlir a, an theihna zawng zawngin min thlawp. Boruak ropui tak zawng a ni," tiin a thlirlet. 

Leeds full-back Ian Harte chuan, "Zan ropui tak a ni. Elland road chu a khat vek a, kan vaiin kan lam a ni ber.  Nilengin ruah a sur a, khelmual te chu an huh hneh hle. Team ṭha em em mai kan hmachhawn zui a, anni ang hneh tur kha chuan vanneihna kan mamawh tel a ni," a ti. 

Hetihlaia AC Milan team-ah hian Andriy Shevchenko, Paolo Maldini leh Oliver Bierhoff-te ho an awm a, 'team ṭha' tih loh rual an ni lo - khatihlaia Leeds fan-te khan ropuina chu an hnaih ta nia an inngai a nih pawhin dem theih an ni lo ang. 

Leeds hian Champions League qualifier-ah 3-1 in 1860 Munich chu 3-1 in an hneh a, 1992-93 hnua a vawi khat nana Champions League an khelh group stage-ah Barcelona, Milan leh Besiktas nen an awm. 

English club tan chuan, "Ka dil loh zawk," tih mai chi a ni - mahse Barca laka an mualpho hnuah Milan an hneh a, Besiktas chu 6-0 in an sawp zui. 

Khualmualah Besiktas an inhnehtawkpui leh a, Elland Road-ah 1-1 a Barca an draw hnuin San Siro-ah Milan chu 1-1 in an inhnehtawkpui leh a, an tlang.

Hetihlaia Leeds midfielder Eirik Bakke chuan, "Barca laka kan mualpho khan min kai tho a ni," a ti a, Harte chuan, "Barca lakah kan chak lo a, mahse kan tlawm lo. Besiktas leh AC Milan  hneh thei kan ni tih rilru huaisen min put tirtuah a ṭang ta zawk a ni," a ti. 

Champions League group stage match an khelh laia Leeds buaina ber chu an defender Jonathan Woodgate leh player pawimawh Lee Bowyer buaina chu a ni. 

January thlaa player pahnih nightclub lengin buaina an tawk a, midang tihnat tuma tharum thawhah puh an ni - he thil thleng vang hian player pahnih hi court lamah an inlan zak zak a ngai reng a, buaithlak a tling. 

Leeds manager O'Leary chuan, "Hun harsa tak a ni. Ngaihtuah loh tum mah ila rilruah a awm reng zel a, khatiang buaina kara player-ten result ṭha an nei zel thei kha chu fakawm tak an ni," a ti. 

Bowyer hi court leh khelmual inkar a kar tawn reng a ngaih avangin helicopter hmangin inkhel turin a kal mai zel a, a mimal buaina chu team-in an tawrh a duh lo. 

Champions League 2000-01 season-ah hian tun angin season hman a la ni lo. Knockout round lut team 16 chu second group stage-ah group paliah ṭhenin team pali zelin awmtir an ni a, group tina a sang pahnihin quarterfinal an lut ang. 

Second group stage-ah pawh Leeds tan kalkawng a la awlsam chuang lo. Real Madrid, Lazio leh Anderlecht te nen dah ho an ni - Real ropuizia sawi nawn a ngai lo a, Lazio hi a hunlaia Italian champion niin Pavel Nedved, Juan Sebastian Veron leh Hernan Crespo te ho an nei. 

Harte chuan, "Kan player neih te, fan kan neih dan te, kan khawpuiin min thlawp dante kan en chuan, Elland Road-ah khan eng team mah hlauh kan nei lo. A tirah kha chuan tu nge kan nih an hre lo a, a hnu lamah erawh an hrechiang ta hle," a ti!

Ni e, Harte sawi angin Leeds an zam lo - Real an ngam loh hnuah Lazio chu khualmualah an hneh a, Anderlecht chu a zawnin an hneh a, Santiago Bernabeu-ah 3-2 in tlawm leh mah se match tawp berah 3-3 a Lazio inhnehtawkpuiin an tlang. 

Leeds-in group stage hautak pahnih an paltlang a, quarterfinal-a an hmabak chu Spanish champion Deportivo La Coruna a ni - La Coruna vanglaite hi ngaihnawm a tling. 

Spanish team hian playmaker thiam bik Juan Carlos Valeron, Brazilian player hmuhnawm Djalminha leh Dutch goal machine Roy Makaay te an kawl a, Elland Road an lenluh hmain Makaay chuan, "Quarterfinal-a team chhe ber," tiin Leeds chungchang a sawi. 

Mahse, Makaay a ṭawng sual tlat - Harte, Alan Smith leh Rio Ferdinand-te goal khung hmangin 3-0 in Deportivo an tlawm a, Elland Road-a Leeds fan-te chu Makaay tih elin, "Team chhe ber lakah 3-0 in in tlawm," tiin an zai rual!

Quarterfinal second leg-ah 2-0 in Leeds an tlawm a, first leg-a an goal khung tam zar sengin semifinal an lut. Bakke chuan, "Minute 17 a la awmin 2-0 a ni a, kan chelh hram hram a ngai tih kan hria. Kil tin aṭangin min bei a ni ber a, goalkeeper Nigel Martyn chuan a dang zawt zawt a ni ber mai," a ti. 

Leeds-in semifinal an lut a, thawnthu thar ziah chhunzawm zel an duh - mahse an thawnthu thamral ṭanna tur a lo ni reng si. Valencia an hmachhawn a, first leg-ah 0-0 in inhnehtawk mah se khualmualah 3-0 in an tlawm a, thawnthu chu tihtawp a ni ta.

English club hi an vanduai tih loh rual erawh a ni lo - second leg-ah hian an thiampuipa Bowyer chu hrem vangin a inlan thei lo a, second leg an khelh leh hma hian Premier League lama match 13 chhung tlawm loa an kal zawn tawh chu Arsenal-in an tihtawpsak bawk. 

Gunners lakah Leeds player-te an chau tih hai rual a ni lo a, Bowyer tel loin Valencia mualah an thamral - Spanish club goal hmasa ber Juan Sanchez-a khung hi a kut hmanga a khung a ni a, mahse referee-in a pawm tlat. 

Sanchez-a'n a goal hnihna a khung hnuah Gaizka Mendieta chuan a belhchhah ve leh a, Leeds an tawp ta - Harte chuan, "Stadium-a awm te kha chuan a kut hmangin a ti goal tih an hre vek a, hrehawm kan ti hle. Mahse, Champions League mawina tem tir kan ni a, nuam kan ti em em a ni," a ti. 

Champions League semifinal aṭangin Leeds an tla a, Premier League-ah point khat lekin pathumna Liverpool an phak lo bawk - hetihlai hian Premier League-a pathumna chinin Champions League an khel ṭhin. 

Leeds tan kalkawng a harsa ṭan - Champions League an khelh phak loh avangin sum lam buaina a inṭan a, man to tak taka Olivier Dacourt, Viduka, Dominic Matteo, Ferdinand leh Keane te ho an lei chuan anmahniah nghawng a nei ṭan. 

Hetichung hian season tharah an insum lo. Liverpool legend Robbie Fowler leh Derby County midfielder Seth Johnson-te chu pound maktaduai 11 leh 9-in an lei zui a, transfer fee aṭangin sum hmuh an nei mang lo thung!

Kum 2002-03 season a herchhuah meuh chuan Ferdinand, Keane, Bowyer, Woodgate leh Fowler ten an chhuahsan a, Leeds tlakchhiatna a inṭan tih football fans chuan an hrethiam vek. 

Player langsar zingah  Harry Kewell, Olivier Dacourt leh Nigel Martyn-ten 2003-04 season ṭan dawnah Leeds an chhuahsan leh a, Premier League aṭangin an relegate zui.

Bakke chuan, "Rio leh player langsar dang tam tak khan Champions League khelh an duh a, chhuah an rilruk ṭan a ni. Champions League kha khel pha ila chuan vawiina kan thawnthu hi a danglam ngei ang," a ti. 

Harte chuan, "Footballer chuan kan ball boot-te kan khai fel hnuah kan career kan thlirkir a, nomawi kan chawite sawi nuam kan ti ṭhin. 

"Hrehawm ka tih ber chu khang player ṭha tak takte nena nomawi chawi sawi tur kan nei miah lo hi a ni," a ti - Harte, kan dem lo che.