US Open champion thar Stephens

Thlipui na tak hurricane-in a nuai hmabaka an awm mek laiin Florida chuan thlipui an tawrh hmain chanchin lawmawm an nei. Florida nula Sloane Stephens chuan Madison Keys hnehin US Open nomawi a chawi - Stephens tan hian a Grand Slam title hmasa ber a ni.

Inrinni zan khan world number 83 Stephens hian darkar khat leh minute khat chhung lekin Keys chu 6-3, 6-0 in a sawp. Arthur Ashe Stadium-a inkhel entu ten American nula pahnih inkhel tawk tak hmuh beisei mah se seeded 15-na Keys-in beisei a phak lo a, a hnam pui Stephens lakah a service vawi nga a hloh laiin vawi khat mah a chhuhsak ve thei lo.

Kum 24 mi Stephens leh Keys te hi naupan lai aṭanga ṭhian inkawm ngeih an ni a, an pahnih hian Grand Slam final an vawi khat khelhna ve ve a ni. An pahniha an ranking belhkhawm chu 99 niin US Open bikah hmeichhe singles finalist pahnih an ranking a hniam ber ṭum a ni.

Thawhlehna
Feet 5 leh inches 7 a sang Stephens hian kum kua lek a nih lai aṭangin tennis a khel ṭan a, player beisei awm tak zinga mi ni mah se hliam a neih fo avangin beisei a phak lo. A ke phah hliam zai a ni a, kum khat chhung zet a inkhelh mumal theih loh avangin July thla tawp kha chuan world number 957 a ni.

Thla 11 a inkhelh theih loh hnuah Wim­bledon-ah a rawn inlan ve leh thei ṭan a, US Open khel tur pawh hian seeded a ni phak lo. Mahse, inelna tak an hmachhawn chinah erawh player hlauhawm ber a ni, final lut tur hian semifinal-ah Grand Slam vawi sarih champion tawh Venus Williams a hneh - seeded chang phak lo chunga US Open champion thei player pangana a ni ta der mai.

Stephens chuan, "January thla khan zai ka ni a, min hnem tute chuan season tawp hmain US Open champion ka nih theih thu min hrilh a, thil theih loh hulhual a nih thuin ka chhang. Zinkawng ngaihnawm leh hautak inṭan tur chuan harsatna paltlang hmasak a ngaih chang a lo awm a ni," tiin a sawi.

Williams unauin tennis khaw­vel an thunun hnuah American hmeichhe player dang ten nomawi an chawi ngai tawh meuh lo. Kum 2002 khan Jennifer Capriati-i'n Australian Open title a la a, ani hnuah Stephens hi Williams unau ni lo American nula zinga Grand Slam champion ni leh thei hmasa ber a ni. US Open champion a nih vang hian world ranking-ah point 2,000 a hmuh belh bakah Rs 23,98,17,751 a dawng bawk.

Tuar thiam a har - Del Potro
Juan Martin del Potro tan US Open final kawng a ping. Argentina tlangval hian semifinal-a Rafael Nadal a hneh lo chu tawrh thiam harsa a tih thu a sawi chhuak.

Grand Slam vawi 15 champion tawh Nadal chuan Del Potro chu 4-6, 6-0, 6-3, 6-2 a hnehin final a lut a, semifinal lehlamah Kevin Anderson-a'n Pablo Carreno Busta 4-6, 7-5, 6-3, 6-4 in a hneh bawk. Nizan khan Nadal leh Anderson ten final an khel a, he thu buatsaih lai hian result kan hre hman lo.

Quarterfinal-a Roger Federer hnehtu Del Potro chuan, "Ka chak loh avangin hrehawm ka tiin ka lungngai hle, tunah chuan ka tuar thiam rih lo. Naktukah emaw hun a inher zel hunah ka la pawm thiam ve mahna," tiin a sawi.