Laipui vawi thum a puak

Inrinni zan Premier League inkhelah Arsenal chuan an mikhual Bour­nemouth 3-0 in an hneh. Emirates Stadium-a in­khelah Gunners tan Danny Welbeck-a'n goal hnih a khung bakah striker thar Alexandre Laca­zette-a'n a khung bawk.

Arsene Wenger-a'n tlarhnungah player pathum Laurent Kos­cielny, Shkodran Mustafi leh Nacho Monreal a dintir a, wing back Sead Kolasinac leh Hector Bellerin ten an hna an tlin bawk avangin Liverpool laka goal li chhuah Arsenal tlarhnung a phui.

Season hmasa Gun­ners tana goal khung hnem ber Alexis Sanchez chu bench-ah ṭhuttir a ni a, hun tawp hma minute 15 la awmah luhtir a ni - Chile internantional hian khelmual chhunga hun rei lote a hman chhungin Bournemouth tlarhnung ṭum thum a chhaih buai hman.

Gunners manager Wenger chuan, "Alexis Sanchez hian Premier League leh Europa League a ngaipawimawh hle a, season hmasa lama a khelh dan ang khan a khel chhuak leh ṭep ang, fan-te lawm hlawh turin a che chhuak leh dawn a ni," tiin a sawi.

North London club hian Wenger-a kaih­hruaina hnuaia a vawi khat nan Europa League an khel dawn a, Ningani zan hian an group match hmasa ber khel turin Bundesliga club Cologne an mikhual ang.