Mizoramin Ranji Trophy khel dawn

Committee of Administrators (COA) chuan Zirtawpni khan North East state paruk Mizoram, Meghalaya, Manipur, Sikkim, Nagaland leh Arunachal Pradesh te chuan season thar aṭangin India rama cricket inelna lian Ranji Trophy-ah an inlan thei ang.

NE state paruk aiawh hian darkar khat leh a chanve chhung COA chief Vinod Rai an kawm a, kumin Ranji Trophy inelnaah NE state aiawh team khat tel an dil. Amaherawhchu, October thlaah Ranji Trophy hi khelh ṭan a nih tawh dawn avangin an dilna hi an hnawl a, season tharah team hran ṭheuha Ranji Trophy-a khelh an phalsak thung.

NE state-te hian tun season aṭangin age group inelna category pathum Under 16, Under 19 leh Under 23-ah chuan team an thawh thei ang. COA chuan U-16 National Championship (Vinoo Mankad) leh U-23 (CK Nayudu Trophy) inelnaah chuan North East Zone a awm hrang dawn a, Cooch Behar Trophy (U19) kalpui dan tur a la chiang lo. Inelna kalphung hi technical committee chairman Sourav Ganguly kutah a awm ang.

COA hi India rama cricket-a thuneitu sang ber BCCI enkawltu an ni a, member pali awmna niin Supreme Court ruat an ni.