Kane-a'n century siam

Inrinni zan khan Goodison Park-ah Tot­tenham Hospurs-in mualneitu Everton 3-0 in an sawp a, Harry Kane-a'n goal hnih a khung bakah Christian Eriksen-a'n goal khat a belh ve bawk.

English striker Kane hian August thlaa shot vawi 25 a nei chungin goal a khung lo a, minute 28-naah Spurs striker hian mual sir aṭangin a pet goal. Hei hi kum 24 mi Kane-a'n Spurs tana a goal 100-na a ni a, English striker hian match 169-naah goal 101-na a khung leh bawk.

Tottenham boss Mau­ricio Pochettino chuan, "Kan khel ṭha takzet a, inkhelh harsatna hmun Goodison Park-ah inkhel kan thunun a ni. Goal a khung avangin Harry ka lawmpui a, hun rei lote chhung goal a khung loh lai pawh khan a theihna hi kan ringhlel ngai lo," tiin Kane a fak.

Kane hian Spurs tan league-ah goal 80 a khung a, Champions League-ah goal hnih, Europa League-ah goal riat, FA Cup-ah goal nga, League Cup-ah goal li leh Europa League qualifier-ah goal hnih a khung bawk.

Spurs hian league-ah tun season-a home match an khelhna Wembley Stadium-ah chak an la nei lo a, he hmunah hian September 13, Nilaini hian Champions League group stage-ah Borussia Dortmund an mikhual ang.