MPL champion = I League champion

Mizoram Premier League Season 6-ah champion lai Chanmari FC leh I League champion Aizawl FC te chu Zirtawpni zan khan Lammualah 1-1 in an inhnehtawk.

MPL match hnih khelh tawhah H. Vanlalthlanga hote leh Paulo Menezes hoten hneh loh an la tawng lo a, amaherawhchu Portuguese coach kaihhruai AFC-in hneh an la nei lo thung.

Goal inang teuh

Chanmari FC defender Lalro­sanga'n minute 26-naah halfway line bul aṭangin freekick a pet a, amah veng­tu lak aṭanga tâl pût Lalmuanzuala, Lengpui tlangval chuan a ke dinglamin goal kilah tak a pet goal nghal.

First half tawp hma hretin Aizawl FC defender Lalrozama'n ball a vawrh lut a, keeper Lalmuanawma'n a hnek per theih loh nan AFC forward Jonathan Lalrawngbawla'n nek buaiin a per chu midfielder ball thiam David Lalrinmuana'n harsatna nei loin a khung.

Welcome Alex

Chanmari FC-in an forward Alex Whittemore an tlangzarh a, Liberian forward hi Aizawl FC midfielder Alfred Kemah Jaryan ṭhian ṭha tak a nih avangin I League club-in a theihna chin an hria tih a lang nghal.

Portuguese coach Paulo-a'nAlex veng turin a Nige­rian defender Kareem Omolaja a ruat a, AFC defender hian chungnung zawk ṭum ngah mah se Liberian striker Alex hian a theihna a pholang. MPL-ah 'target man' hmuh tur a awm a, Alex hian ball kang a lak theih bakah amah thlawptute a hmuh hmaih lo.

Liberian striker hian defender nei ṭha ber zinga mi Aizawl FC lakah bul a ṭan a, tun season a hmang tluan a nih chuan goal khung loin Mizoram a chhuahsan lo ang.

Hmabak êng Jona

Portuguese coach Paulo-a'n trai­ning-na milin player a thlang tih a lang a, tawnhriat nei player thlauh thlain a enkawlna hnuaiah Electric Veng rawlthar Jonathan-a chu goal khung tura rinrawl berah a siam.

Chanamri FC lakah Jona hian a thiamna a pholang a, AFC Academy chhuak striker hian a tlan chakna leh thiamna hmangin defender a rum ṭhaih.

Jona hian inkhelh bul ṭan phatah K.Lalṭhathanga tan ball

ṭha bik a siamsak a, Chanmari FC keeper pahnih Lalmuanawma leh Malsawmdawngliana te tan hna a siamsak ve bawk. Amaherawhchu, Jona hian minute 80-naah goal khung loin khelmual a chhuahsan a, hnai taka hlah a neih avangin inzirna tur a la ngah.

Mama & David

Mizoram football hming timawi­tute pahnih S. Malsawmltuanga leh David Lalrinmuana te inkhel bul an ṭan a, AFC-in Portuguese coach duh dana ball inpe kual chunga an khelh theihna chhan an ni.

Season liam taa East Bengal-a hun hmang David a fit ṭan a, Lammualah a tlangnel leh tawh hle. Mama'n zan lam inkhelah insiamrem turin hun mamawh tam deuh mah se hun tawp lamah a thluak fimna a lang a, ball fing tak tak a la pe hnem hle.

Muanna C. Muana

Chanmari FC-in squad an nei chhah ṭha tawk lo a, coach Thlanga'n an khingpui hre ranin AFC player-te ball inpe inkual dang chat turin defender Lalmuanawma chu defensive midfielder hna a pe.

Rochhingpuia inhliam vanga inlan C. Muana hian a tihtur chin a hria a, Chanmari FC tlarhnung tan muanna tham a tling.

Buaina keeper

Aizawl FC-in I League an champion theihna chhan chu keeper Albino Gomes an lakfuh vang a ni pakhat a, Goan keeper hian ISL club Delhi Dynamos a zawm tawh avangin a aiah East Bengal keeper Avilash Paul an lalut. MPL match hnih aṭanga teh chuan Avilash hian team chakpui a la hlat a, Mizo keeper Lalawmpuia leh H. Lalremruata te nen khelhna hmun a inchhuh chho ang.

Chanmari FC-in keeper-ah F. Lal­muanawma an nei a, Santosh Trophy-a Mizoram keeper hian theihna sang tak nei mah se boruak sangah keeper dang ang tho a ni - a talbuai. Aizawl FC lakah Chanmari FC goal chhuah chhanah hian mawh a phur.

Muanawma inhliam vanga lut keeper MS-a pawhin a fimkhur tawk loh vangin AFC forward Jona tan goal khungna hun ṭha a siam sak ve tho a, MPL hmuhnawm zawk en turin keeper-in hma an sawn a pawimawh dawn.

Engtin zel?

Chanmari FC hian September 14, Ningani tlai hian Mizoram Police an hmachhawn dawn. Inkhel en châkawm tur September 15, Zirtawpni zana hmahruaitu Chhinga Veng leh I League champion Aizawl FC inkhel a ni ang.

Aizawl FC-in Chanmari FC an khelh ṭumin supporter an neih ṭhat zia an pho lang a, Zomuanthanga Stand mawi tham an pun khawm bakah Lammuala tikhawk pha thawm an nei bawk.

Chanmari FC-in supporter neih ṭhat kawngah MPL a an champion hmasak ber ṭum an la pha lo a, amaherawhchu an mipuite ngaihnat Thlanga coach atan an nei tawh a, result ṭha an neih an tluk thuai ang.