City-in Reds tukdawl, United an chelh

Arsenal laka goal li khung thei Liverpool-in tlarhnung thuam ṭha Manchester City lakah goal an khung loh bakah goal nga an chhuah. Bet365 Stadium-ah Manchester United-in point khat bak an hlawh chhuak lo a, Jose Mourinho hoten point 10 hmuin hmahruaitu ni chhunzawm mah se Pep Guardiola hote nen point 10 ve ve an hmu.

Etihad Stadium-ah Sergio Aguero hmangin City-in bul an ṭan a, August thlaa player of the month-a thlan Reds forward Sadio Mane hnawhchhuah a nih hnuah mualneitu lam tan Gabriel Jesus leh Brazilian forward thlaktu Leroy Sane ten goal hnih ve ve an khung belh. Kum 1937 hnua City-in Liverpool an hneh chian ber ṭum a ni.

Inrinni zan inkhel hnuhnung zawkah Eric Maxim Choupo-Moting hmanga Stoke City hmahruaina chu United-in Marcus Rashford leh Romelu Lukaku te goal hmangin chhang let mah se Choupo-Moting bawkin mualneitu tan a khung a, 2-2 in inkhel a tawp.

Red Card phu Mane

City leh Reds inkhela goal a luh tam chhan chu Mane red card hmuh vang a ni. Senegalese forward Mane hian minute 37-naah City keeper Ederson hmaiah a tlawh a, Reds forward hian goal khung a tum a, tlawh nat tum lo mah se a hmaiah chiang taka tlawh avangin Jon Moss tan red card phawrh mai loh chu tih theih dang a awm lo. Brazilian keeper Ederson hi khelmualah enkawl a nih hnuah a nat dan zir chian a ṭul avangin Claudio Bravo-a'n a thlak.

Liverpool manager Jurgen Klopp chuan, "Red card kha inkhel result thlaktu a ni. Mi tam takin 100% red card an ti dawn tih chu ka hria a, amah­erawhchu pawnah khan Pep nen kan awm duna red card-ah kan ngai lo ve ve. Keeper kha na viauah kan ngai vek a, amaherawhchu inkhelh banah a tlan kual thei a, na tak chu a ni lo," tiin referee thutlukna an chak loh pui thu a sawi.

Aguero leh

Chamberlain-a telna

Manchester City-in Sergio Aguero an mamawh tih a lang nawn a, Argentine forward hian 'cool' takin goal hmahruai a khung a, mahni hma sial lo takin Jesus-a goal hnihna khung tur a siam sak leh bawk.

Pep-a hoten Liverpool tlar­hnung pawp zia an pholang a, Klopp-a'n a khelhdan phung a thlak si loh avangin Reds-in an elpui City lakah goal nga an chhuah. Liverpool-in Arsenal 4-0 a an sawp ṭuma Gunners starting eleven-a tel Alex Ox­lade-Chamberlain pawhin Reds kawr hain khelmual a rawn rap a, English midfielder luh hnuah Klopp-a hoten goal thum dang an chhuah belh.

Alex Oxlade-Chamberlain hian kum 16 a nihin Sou­thamp­ton tan a khel ṭan a, Hud­dersfield Town 5-0 in an sawp. Amaherawhchu, Chamberlain hian Arsenal kawr a hak hmasak berin Manchester United lakah 8-2 in an chak lo tawh a, Gunners dinhmun chhiat lai tlansan turin Liverpool a pan a, match zawnin mualphona a tawng.

United ngam loh Choupo-Moting

Manchester United-in season liam ta khan Jose Mou­rinho hnuaiah a zawnin match thum an chak a, international break zawhah an che chhe ṭan. Tun season-ah Mourinho hote hi a zawnin vawi thum tho an chak a, international break zawha an match hmasa berah Stoke City-in an chelh. Potters tana inkhel bul ṭantute hi ram hrang vek an ni.

Arsenal nen pawha an sawi zawm tawh Choupo-Moting hian Bundesliga club Schalke aṭangin Stoke hi a zawm a, English club tana a goal hmasa ber chu United-in tun season-a an goal chhuah hmasa ber a ni a, Cameroonian goal hnihna chu Mourinho hote 100% a an chak tluang lai tihtawp nan a tawk bawk.

United tan Lukaku-a'n goal khung bawk mah se Bel­gian striker hian chakna goal khung theihna tur hun ṭha a hlah a, Mourinho hote tibeidawngtu zingah United player hlui Darren Fletcher leh Mame Biram Diouf te an pawimawh hle. Minute 90 chhunga chungnung zawk erawh United an ni tho a, Stoke goalkeeper Jack Butland chuan hun tawp hma hretin save ṭha bik a nei ve bawk.

Inkhelh banah Stoke coach Mark Hughes-a'n Mourinho chibai a tum a, Portuguese manager hian a chibai duh lo. Press conference-ah he­mi chungchang zawhna hi Mou­rinho an zawh avangin United manager hian zawhna dang chhang loin a chhuak tau.

Hmabak Champions League

Champions League a inher chhuak leh ta a, United chuan an match hmasa berah September 12, Thawhlehni zan hian FC Basel an mikhual ang. United hi Group A-ah Basel, Benfica leh CSKA Moscow te nen awm ho.

Manchester City-in an phur vanglai takin September 13, Nilaini zanah Netherlands-ah Feyenoord hmachhawn turin an zin ang. Pep Guardiola hote hi Feyenoord, Napoli leh Shakhtar Donetsk te nen Group F-ah an awm. Hemi zan vek hian Liverpool-in Spanish club Sevilla an mikhual dawn a, Reds hi Group E-ah Sevilla, Maribor leh Spartak Moscow te nen an awm.