Hoffenheim-in Bayern an hneh

German champion Bayern Munich chu Hoffenheim lakah si hnih faiin an tlawm. Inrinni zan inkhel dangah Borussia Dortmund chuan SC Freiburg chu goal awm loin inhnehtawk pui mah se point sarih hmuin league hmahruaitu an ni.

Rhein Neckar Arena-a inkhelah Hoffenheim forward Mark Uth chuan minute 27 leh 51-naah goal a khung. Champions League playoff-a Liverpool laka goal khung tawhtu kum 26 mi Uth hian tun season inelna hrang hrangah match ruk khelin goal nga a khung der tawh.

Bayern Munich hi Bun­desliga bikah chuan kumina an chak lohna hmasa ber niin tun hnai thla nga chhunga an vawi hnih chak lohna a ni a, an hneh loh hnuhnung ber chu Mizorama rawn inkhel tawh Hoffenheim tho hi an ni.

Germany international Thomas Muller-a'n a club tana a match 400 khelh tlinniah goal a pai lo a, Bayern forward hi goal hmaah a vannei tawk lo. Striker Robert Lewandowski chuan woodwork a tihper bakah Arjen Robben, James Rodriguez leh Franck Ribery ten ni dang chu nise an khung ngei tura ngaih an hlah vek bawk.

Bayern Munich manager Carlo Ancelotti chuan, "Inkhel harsa tak a ni a, chutih rualin hetiang result hi chu football-ah a thleng ve fo a ni. Goal khung theihna hun ṭha tam tak insiam thei mah ila kan khung lo. Hoffenheim lam khan hun ṭha vawi thum an neih zinga vawi hnih an chhawr ṭangkai thung. Kan result khaikhawm nan chuan ka naute khan inkhelah an rilru zawng zawng an seng lo ni berin ka hria," tiin a sawi.

Hoffenheim manager Julian Nagelsmann chuan, "Bayern hneh tur chuan ruahmanna fel tak kan neih a ngai a, a tihlawhtling turin player an chetṭhat a ngai bawk. Tun

ṭumah bik kha chuan hnehna chang tura kan mamawh ang takin kan che thei a, a bik takin Uth a khel ṭha hle," a ti.

Inkhel dangah season thara Liverpool palyer ni mai tur Naby Keita goal khung hmangin RB Leipzig chuan khualmualah Hamburg 2-0 in an va luhchhuah.

Pound maktaduai 48-a Reds nen inrem tawh Keita hian minute 67-naah yard 30 zeta hla aṭangin goal chung kilah a thlawh lut a, season hmasa Bundesliga pahnihna Leipzig goah hnihna hi Germany international Timo Werner khung a ni thung.

Inkhel Results
Freiburg 0 - 0 Borussia Dortmund
Borussia Monchengladbach 0 - 1 Eintracht Frankfurt
Augsburg 3 - 0 FC Cologne
Mainz 05 3 - 1 Bayer Leverkusen
Wolfsburg 1 - 1 Hannover 96
Hoffenheim 2 - 0 Bayern Munich