Goal nen Mbappe inlar nghal

Kylian Mbappe chuan a club thar Paris St-Germain tana a inlanna hmasa berah goal a khung bakah assist a nei nghal. Zirtawpni zan French Ligue 1 inkhelah PSG hian table mawngphaha awm Metz chu 5-1 a sawpin league hmahruaitu an ni.

Kum 18 mi Mbappe-a'n a club thar hnehna a chanpui lai hian a chhuahsan tak AS Monaco erawh Inrinni zan khan Nice khelmualah 4-0 in an tlawm. Nice tan hian Liverpool striker hlui Mario Balotelli chuan goal hnih a khung bakah Alassane Plea leh Ignatius Ganago ten an khung bawk - Nice hian Ligue 1 champion lai Monaco-in hneh loh nei loa season bul an

ṭan chu an tihtawp sak.

PSG an hrang

Beisei loh takin Metz hian chawhlawk hmain 1-1 in an nihrual a, Edinson Cavani-a hmahruaina goal chu Newcastle striker hlui Emmanuel Riviere-a'n a sut. Minute 56-naah Tottenham defen­der hlui Benoit Assou-Ekotto chu Mbappe a tihtluk avangin hnawhchhuah a ni a, player 10-a khel Metz tan PSG player manto rual dan theih an ni tawh lo.

Uruguay international Cavani-a'n a goal hnihna a khung bakah Mbappe, Neymar leh Lucas Moura ten goal khat ṭheuh an khung belh. Season hmasa Ligue 1 top scorer Cavani goal khung tur pahnih hi player manto ber Neymar leh rawlthar duhawm Mbappe te siamsak a ni.

PSG tan match 180 a khelh

aṭanga goal 156 khung thei Zlatan Ibrahimovic-a'n Manchester United a pan khan ṭhenkhat chuan Paris club hian goal khung kawngah harsatna an tawk tura ngaih a ni. Mahse, Swede striker palian hmunruaka ding Cavani-a'n a hmunruak a hnawhkhat ṭha rih hle.

Kum 30 mi Cavani hian season hmasa khan league goal 35 a khung a, tun season-ah match nga khel tawhin goal sarih a nei leh der tawh. Unai Emery enkawl PSG hian season hmasa khan an beisei ang nomawi an chawi lo. Kuminah erawh sum an hmang hnem a, result pawh an nei ṭha zui nghal. Neymar, Mbappe, Julian Draxler, Cavani, Lucas, Angel di Maria, Dani Alves, Hatem Ben Arfa, Marco Verratti leh Javier Pastore te awmna club hi Europe-a club lian dang tan pawh hmachhawn an châkawm loh khawp ang.

PSG manger Emery chuan, "Zawimuangin kan kal zel ang, Mbappe khelhdan khan mi tilawm, khatianga theihna nei sang bik a nih vanga lalut kha kan ni. Kan team-ah player ṭha fal an awm nual a, a bik takin tlarhma lam an filawr hle. Ka tan tlarhma leh tlarhnung inchawih taka rem chu hna pawimawh a ni," tiin a sawi.

PSG neitute hian France chauh ni loin Europe lama hlawhtlin an duh a, hei vang hian player lei nan pawh sum an ren lo. Sevilla manager hlui Emery hian season hmasa khan Barcelona a ngam lo - tun season-a an Champions League group match hmasa ber atan Thawhlehni zan hian Celtic an lenchilh ang.

Inkhel Results
Nice 4 - 0 Monaco
Caen 2 - 1 Dijon
Montpellier 0 - 1 Nantes
Strasbourg 0 - 1 Amiens SC
Troyes 0 - 0 Toulouse