Barcelona ropuina Lionel Messi Real Madrid-in point hloh nawn

Lionel Messi-a hattrick hmangin Barcelona chuan an mikhual Espanyol chu 5-0 in an sawp a, Inrinni zan inkhel dangah Real Madrid erawh an mikhual Levante nen 1-1 in an inhnehtawk. La Liga champion Real hian a zawnin match hnih hnehna an chang zo ta lo.

Nou Camp-a Catalan derby khelha player langsar ber chu Messi a ni. Barca forward Messi hian a thiam dan takin box chhungah Ivan Rakitic-a pass leh Jordi Alba siamsak vawi hnih chu goal-ah a chantir ve ve a, a club tan a vawi 38 nan hattrick a siam. Argentina captain hian Catalan derby-ah goal 18 a khung tawh - ani aia khung hnem an awm lo.

Barcelona tan hian khawvel player manto ber pahnihna Ousmane Dembele chu minute 68-naah bench aṭanga luhtir a ni. Pound maktaduai 96.8 man Borussia Dortmund forward hlui hian khelmual a luh aṭanga minute 20 hnuah Luis Suarez goal khung tur a siamsak. Barca tan hian defender Gerard Pique chuan goal khat a tauh lut bawk.

Coach thar Ernesto Valverde kaihhruaina hnuaiah Barca hian La Liga match thun khelh tawhah hnehna chang vekin goal kua an khung tawh a, an lamah a la lut miah lo bawk - point kua hmuin league hmahruaitu an ni.

Kum 53 mi Valverde chuan, "Result chauh an en chuan nuamsa taka chakah min ngai a ni mai thei. A nihna takah chuan derby khelh hi engtik lai mahin a awlsam ngai lo, a hunah tak ka player-te an hriam em avang chauh a goal nga khung thei kan ni," a ti.

Spaniah manager hian a player thar Dembele chungchang sawi zuiin, "Team-ah phurna a siam a, enbik pawh a hlawh hle. Minute 90 inkhel turin a inpeih a, chutih rualin player thar a la nih avangin zawi muanga kan chhawr thiam a pawimawh ang," tiin a sawi.

Barcelona hian Thawhlehni zanah hna hautak an thawk zui nghal dawn. Season hmasa Champions League semifinal-a anmahni pet chhuaktu Juventus chu group match hmasa ber khel turin an lo mikhual ang - club pahnih te hian tun season league match bikah hneh loh an la tawng lo.

Real an chelh nawn

Champion lai Real Madrid-in Cristiano Ronaldo tel loin an ke chheh an la her rem thei rih lo zel. Zinedine Zidane-a naute hian an mikhual Levante forward Lopez Alvarez goal khung chu Lucas Vazquez hmangin sut mah se Santiago Bernabeu-ah chakna goal khung thei an awm miau loh avangin point khatah an lungawi a ṭul.

Real Madrid tan hian hrem vangin Ronaldo a inlan thei lo a, striker Karim Benzema chu malpui hliam vangin minute 27-na lekah Gareth Bale-a'n a rawn thlak bawk.

International break zawh chiah a nih avangin Zidane-a'n a naute a siksawi nual, defender Theo Hernandez leh midfielder Marcos Llorente ten inkhel bul an ṭan laiin - Isco, Casemiro leh Bale te bench lamah chawlhtir an ni. Midfielder Luka Modric leh Keylor Navas te chu squad-ah pawh telh an ni lo.

Real Madrid hian an match hnuhnung zawkah Valencia 2-2 in an inhnehtawk pui tawh a, Levante lakah pawh an player langsar ṭhenkhat tel loin hnehna an chang zo lo leh ta - kum 1995 hnua a vawi khat nan Bernabeu-a an league match hmasa pahnihah hnehna an chang zo ta lo a ni.

Real manager Zidane chuan, "Karim Benzema hi a chawlh chen tur hriat a la ni lo a, a lan dan chuan kar ruk chhung vel chawl tura ngaih a ni. Levante lakah goal khat chiah kan khung thei a, point thum hmuh nan a tawk zo lo. Kan match lehpekah chuan na zawkin kan khingpuite kan nawr ang," tiin a sawi.

Champions League nomawi kawltu Real Madrid hian Nilani zanah an nomawi humhim tumin hna hmasa an thawk ṭan dawn, a zawna league match hnih an chak zawh tawh lohna Santiago Bernabeu-ah hian Cyprus club Apoel Nicosia an mikhual dawn a ni.

Atletico pawh

Inrinni zan inkhel dangah Va­lencia chuan an mikhual Atletico Madrid chu goal awm loin an inhnehtawk pui ve bawk. Atletico Madrid leh Real hian point nga an hmu a, hmahruaitu leh an elpui ni bawk Barcelona chu point liin an thlau tawh. Valencia tan hian Manchester United aṭanga loan-a kal Andreas Pereira chuan inkhel bul a ṭan.

Atletico Madrid manager Diego Simeone chuan, "Team pahnih khelh dan phung inang lo tak kan inhnehtawk a, goal khung lo mah ila ka naute khelh danah lawmna tur tam tak a awm. Game rang leh hmuhnawm kan chhawp chhuak a, hetianga kan khel leh a nih chuan goal chu kan khung em em ang," a ti.