Premier League Club Bihchianna Cherries - United hnawl King & A pa kalsan Wilson

AFC Bournemouth hi kum 1899 khan Boscombe FC tiin din ṭan a ni a, kum 121 zeta upa a ni tawh tihna a ni. Kum za chuang club ni mah se English club ropui tia sawi tur a ni lo a, kum 2015 aṭanga Premier League khel ṭanin tun thlengin club vantlang pawl an ni.

Bornemouth hi Cherries tih an ni a, kum 1910 aṭangin tuna an khelmual Dean Court-ah hian an khel ṭan. Cherries tia an koh chhan hi chi hnihin an sawi. Bournemouth kawr hi a dum leh a sen (cherry red) a ni a, hei vang hian Cherries hming hi an pu niin an sawi. Dean Court bulah hian cherry chinna hmun a awm a, Cherries hming an put chhan niin an sawi ve bawk.

Cherries hi record chhuan tur an nei hran lo a, league hniam lamah hun an hmang tam. Bournemouth-in tun dinhmun an thlen theih nan an player hlui leh tuna an manager ni lai Eddie Howe a pawimawh hle.

Kum 42 mi Howe hi a inkhelh hun laiin defender a ni a, Bournemouth aṭanga inzir chhuakin 1994–2002 inkar khan Cherries tan inelna hrang hrangah match 224 a khel a. Hetihlai hian Bouremouth hi second division club an ni.

Howe hi Portsmouth leh Swindon Town-ah te kalin beisei a pha lo a, kum 2004 khan Bournemouth-ah bawk a let. Cherries hi League One club an ni tawh a, Howe erawh kum 2007 khan inhliam vangin football boot khai a ngai ta thung.

Howe-a'n football khelh a chawlhsan hian kum 29 mi chauh a la ni a, coach hna thawk ṭanin Cherries reserve team aṭangin bul a ṭan. Bournemouth hruaitu duhsakna dawngin manager Jimmy Quinn an ban avangin 2008–2011 chhung khan senior team a enkawl.

English manager hian January 16, 2011 leh October 12, 2012 inkarah Burnley enkawl zawk mah se October 12, 2012 khan Cherries-ah letin tun thlengin manager a la ni. Howe kaihhruaina hnuaiah Bournemouth-in kum 2015 khan Championship nomawi an chawi a, Premier League khel turin an tling. 

Bournemouth hian budget lian tak an nei lo chungin Howe hoin season nga chhung chu Premier League-ah an inhamtang tawh a, tun season-ah erawh 18-naah an awm mek a, relegate thei dinhmunah an ding.

Eddie Howe hnathawhin Joshua King rilru a hneh a, Norwegian striker hi Blackburn-in contract thar zawrh mah se Premier League kaithar Bournemouth lama kal a thlang. King hi United Academy chhuak a nih avangin rawlthar laia lar hat a ni a, tun hnaiah pawh a club hlui Manchester United nen sawi zawm a ni.

Amaherawhchu, King hi beisei angin a ṭhang duang lo a, chutihrualin Premier League club Cherries-ah chuan legend tih theih a ni. Joshua Christian Kojo King hi January 15, 1992 khan Norway khawpui Oslo-ah a piang a, a nu hi Gambian niin a nu hi Norwegian a ni thung.

Oslo-a King-a sei lenna hi hnam hrang hrang awm khawmna a nih avangin hmun nuam a ni lo a, a naupan lai aṭanga ashma nei a nih avangin professional footballer ni tura a zin kawng a hautak hret bawk. Kum ruk a nihin khawtual club Romsas tan a khel ṭan tawh a, kum hnih hnuah Norwegian club ṭha Valerenga a zawm.

Joshua pa Chuku-a'n a fapa inkhel a en avangin vawi tam office kai a ṭhulh a, a fapa tana a inpekna hian rah ṭha chhuahin Ole Gunnar Solskjaer-a'n a hmuhfuh zarah kum 2008 khan Manchester United academy-ah a lut. 

Josh hian United academy tan a theihna pholang mah se senior team lamah Wayne Rooney, Carlos Tevez, Dimitar Berbatov, Cristiano Ronaldo, Ryan Giggs leh Nani te an kat nuk avangin khelhna hmun a chang tam lo.

United-in Josh hi contract an ziahpui a, amaherawhchu loan-in club dangah hun a hmang tam zawk. Sir Alex Ferguson-a'n a chet ranna leh a chakna te avangin fak mah se United-ah hmun a chan miau loh avangin an hnawl. Norwegian striker hian hnawl mah se nasa taka hma a sawn avangin January khan United nen an sawi zawm a, a tak ram erawh a thleng ta lo.

Tlarhmaa Josh-a kawppui Callum Wilson hi Bournemouth innghahna pakhat tiin an sawi theih. Kum 2014 khan Wilson hian pound maktaduai 3.5-in Coventry aṭangin Cherries hi a zawm a, match hmasa berah goal hnih a khung nghal.

Wilson hi Championship-a an champion-na kawngah player pawimawh a ni a, Premier League-ah pawh player ṭangkai a ni zui. English striker hian Bournemouth tana khel chungin England tan vawi li a inlan thei hial.

Kum 28 mi Callum Wilson-a hian eizawnna atana football a hman hma hian hun harsa a patlang. February 27, 1992 khan Wilson hi Coventry-ah a piang a, a pa hi Jamaican niin a nu erawh English a ni thung. Naute mai a la nih laiin a pa hian a nu a kalsan a, Wilson hian a pa tel loin kal a zir a, a naupan hun hi a ngaihawm lo ang.

Wilson-a nu hian fa dang panga a nei zui a, Wilson chuan, "Ka nuin hna a ngah a, chuvangin training-naah pawh min hruai hman lo. Kan chhungkaw ṭhiante leh ka khelhpui chhungten min hruai ṭhin," tiin a naupan lai hun a sawi.

English striker hian kickboxing lam pawh a ti thei viau a, Wilson hi kickboxing-ah vawi thum inlan hmanin a chak vek. Amaherawhchu,  kickboxing thlang loin football-a eizawn a thlang a, an khaw club Coventry aṭangin bul a ṭan. 

Wilson hian Coventry a zawm hian eirawngbawl a thiam loh avangin kawng kam chaw 'burger' te a ei nasa a, a fitness-in a tawrh phah a, hetih hunlai hian a inhliam nasa bawk. Vanneihthlak takin Wilson hian kum 17 mi a nihin Stacey a chhar a, kum khat an inkawp hnuah an cheng dun. Stacey zarah Wilson hian ei tur hrisel a ei chho a, hei hian nasa takin a career pawh a pui hle.

English striker hian Coventry tana a season hnuhnung berah League One-ah goal 21 tehmeuh a khung a, Championship club Bournemouth-in pound maktaduai 3.5 in an lalut a, an tifuh. Tun thlengin Callum Wilson hi Bournemouth player pawimawh a ni.