Hingis leh Murray tan nomawi

Inrinni zan khan US Open mixed double final khelh a ni a, Martina Hingis leh Jamie Murray te ṭangdun chuan Michael Venus leh Hao Ching Chan te inkawp lakah hnehna changin nomawi an chawi.

Flushing Meadows-a final khelhah an intum tawk hle a, set thumna tie break an khelh hnuah seeded pakhatna Hingis leh Murray te hian 6-1, 4-6, 10-8 in hnehna an chang.

Swiss star leh Britain tlangval te hian an ṭan dun hnuah match 10 an khel tawh a, hnehna an la chang fai vek. US Open hma hian Wimbledon nomawi an chawi dun tawh bawk a ni.

Kum 36 mi Hingis hian singles, doubles leh mixed doubles-ah Grand Slam nomawi 24 a chawi tawh a, nizan khan hmeichhe doubles-ah Chan Yung-jan nena ṭangdunin final an khel leh a, he thu buatsaih lai hian result kan hre hman lo.

Hingis chuan, "Cham­pion tur chuan ṭanpui neih ṭhat a ngai a, ka mamawh tak mai Murray ka nei hi ka vannei a ni," tiin a ṭanpui a fak thiam hle. Hingis hian India tlangval Leander Paes nena ṭangdun chungin kum 2015 khan US Open mixed double title hi an lo la tawh bawk.