Amiens an lungawi lo

French Ligue 1 chu hri leng vangin khelh zawh theih a ni lo a, division hniam lama an tlaktir Amiens an lungawi lo - an lungawi lohna lantir nan hian mi hrang hrang chu hming ziak (signature) hmanga thlawp turin hma an la.

Covid-19 vanga league an khelh zawh loh hnuah Paris St-Germain chu champion atan puan an ni. A hniam lama awm pahnih Amiens leh Toulouse te chu an tlahniam thung.

Amiens hi 19-na an ni a, league match 10 khelh hmabak an la nei chungin an chunga awm Nimes chu point liin an phak lo. An khelh hmabak hi khel zo ta se chuan an lehthal emaw, an inthlauhna a zau sawt emaw 

a ni thei.

Amiens chuan thuchhuah siamin, "Amiens chuan kan dinhmun min hriatthiam puia min thlawptu kan zawng, league thuneitute chu an thutlukna ennawn turin kan ngen. An thei lo a nih pawhin Ligue 1 season thar chu team 22 in khel mai ila," an ti.

Amiens hian signature 5,000 neih tlin an tum a, Thawhṭanni tlai khan 4,000 chuang an nei der tawh. An rawtna siam ang chuan Ligue 1 aṭangin tla bik awm lo se, Ligue 2 aṭanga kai thar pahnih Lorient leh Lens te nen an vaia inelna sang ber khelh mai an duh.

Lyon pawh league tih tawp dan chungchangah hian an lungawi bik lo, thubuai ngaihtuahtu sang Court of Arbitration for Sport (CAS) hnenah an zualko tur thu an sawi tawh. Mahse, league thuneitu lam chuan an thutlukna chu khinglet awm mah se an dinngheh tur thu an lo sawi ve tawh bawk a ni.