Nadal - 16 Not Out

King of Clay tia hming an phuah sak Rafael Nadal chu hard court-ah pawh lal ber a ni. Pathianni zan khan Arthur Ashe Stadium-ah world number 1 Nadal chuan darkar hnih leh minute 27 chhung lekin Kevin Anderson chu 6-3, 6-3, 6-4 a hnehin US Open nomawi a vawi thum nan a chawi a - Grand Slam title 16 a lakna chiah a ni bawk.

Kum 31 mi Nadal hian Grand Slam nomawi chawi hnem lamah Roger Federer (19 titles) chiah tluk loh a nei a. US Open bikah hian Open Era chinah vawi thum champion tling thei player parukna a ni a. Federer, Pete Sampras leh Jimmy Connors te vawi nga an champion a, John McEnroe (4 titles) bakah Ivan Lendl (3) leh Nadal (3) te chu sulhnu nei ṭha an ni ta.

Nomawi a chawi hnuah Nadal chuan,"Chawlhkar hnih chhung ropui takin ka khel a ni. Tennis level sang tak ka khel a, inrintawkna ka nei sangin ka tan chuan New York-a nomawi chawi chung ngeia Grand Slam season khar theih tluka lawmawm hi a awm chuang lo," tiin a sawi.

Tennis season khat chhungin Grand Slam tournament pali khelh ṭhin a ni a, tun season bikah chuan Nadal leh Federer ten an insem. Nadal hian US Open hma hian a vawi 10 nan French Open champion a ni. Australian Open leh Wimbledon title chu Federer kutah a awm thung.

South African player Ander­son chuan, "Kan kum a inrual reng a, heti chung hian a inkhel hi ka en a ni deuh ber mai. Ka khingpui tawh zingah chuan tawhkhirh ber a ni a, ka ngaihdan chuan player ropui a nih bakah ambassador ṭha lutuk a ni tel bawk," tiin a hneh loh Nadal a dah sang hle.

Dan rual loh

Flushing Meadows, New York-ah Grand Slam vawi 16 champion tawh Nadal-a'n a vawi 23 nan major tournament final a khel a, a khingpui Anderson tan erawh Grand Slam final hmasa ber a ni thung - kum zat inangah tawnhriat an inneih hnem hleih hle.

Grand Slam final khel tawh zinga player sang ber, feet 6 leh inches 8 zeta sang Anderson hian a ball vuak na leh a service ṭha tak chu a rinchhan ber a ni. Final lut tur hian winners vawi 250 zet a vaw chhuak hman a, tun inelna bikah hian aces (114) siam hnem ber a ni a, match khelh zat inangah Nadal (201 winners) aiin a ball vuak a na tih a hriat theih.

Ball vaw na tak Anderson lakah Nadal a buai duh lo. Nadal hian tun hma lama vawi li a hneh tawh player lakah a service a hloh duh miah lo a, break point pawh vawi khatmah a pe lo. Spanish tlangval hian ace vawi khat chiah a siam nachungin unforced errors vawi 11 bak a nei lo - a tisual thei lo a ni ber.

Rinhlehna karah

Tennis hi game hautak tak a ni a, a khelh hun chhung a reiin thahrui a mamawh hnem. Nadal hian a thahrui a hman nasat ṭhin avangin 'A kum a tam hnuah beisei a phak lo ang' tih chu mi tam tak hmuhdan leh thlir dan a ni. June thla khan Nadal hian kum 31 a tling chiah a, kum 30 a chuanna kumah hian Grand Slam nomawi pahnih chawiin a mah ringhlehtute chu chhanna a pe.

Nadal hian kum 12 liam ta khan Paris-ah a vawi khat nan major title a la a, kum 2005-2014 chhung khan kumtin pakhat tal Grand Slam nomawi a chawi ziah. Kum kua zet a zawna ropuina a chan hnuah kum 2015 leh 2016 khan a record hi a chhunzawm thei lo a, a ropuina ang a neih let leh ringtu chu tlemte an ni.

Amaherawhchu, Nadal hian hliam a nei lo a nih phawt chuan player ṭha berte zinga mi a nih zia a pholang nawn leh ta a, a kum tam deuh tawh mah se player naranin an neih loh thiamna a nei tih chu a chiang takzet. Roger Federer nen an vanglai a intawng a, tennis inelna an tinungin player pahnih inelna ropui ber chu min hmuh chhohtir a ni.

Mangṭha Toni

Nadal-a'n tennis a khelhtirh aṭanga kaihhruaitu, a coach leh patea (uncle) ni bawk Toni Nadal chuan tun season bak chu Nadal nen an thawhdun tawh loh tur thu a tichiang tawh - tun ṭum hi Grand Slam an hmachhawn dun hnuhnung ber a ni ta der mai. Spain tennis palyer hlui Carlos Moya chu a coach thar a ni chhunzawm ang.

Thlahna thu sawiin Nadal chuan, "A laka lawmthu sawi tur ka neih zawng zawng hi sawi zawh sen pawh a ni lo ang. A nihna takah chuan ani tel lo hi chuan tun hun hi ka thleng thei dawn lo a ni. Hun harsa a tawh leh a rilru a hnual changin min fuih phur reng a, a hnungah zawi muangin min nawr reng a ni," a ti. Toni hian an ramah nikuma din Nadal-a tennis academy a enkawl zui dawn.