UCL khel turin kan inpeih - Conte
Chelsea manager Antonio Conte chuan amah leh player-te chu Champions League khel tura an inpeih thu a sawi. Premier League champion hian zanin dar 12:15 hian Stamford Bridge-ah Azerbaijani club Qarabag an mikhual dawn. Group C inkhel dangah Roma leh Atletico Madrid te an inkhel bawk ang.
Blues hian FA Community Shield-a Arsenal an hneh loh hnuah league match hmasa berah Burnley an hneh lo nghal mah se match thum a zawnin an chak leh tawh. Chelsea hian London derby-ah Tottenham an hneh a, Everton leh Leicestery City an hneh leh bawk.
Italian manager Conte chuan, "Champions League kan khel tur hi kan phur tawh hle. Mi tupawhin Europe inelnaa khel turin kan ṭha tawk lo pawh an ti thei a, kan tan buai phahna tur a ni lo. Kan hna chu khelmual chhungah a ni a, kan theihna zawng zawngin kan khel tur a ni. Season liam ta pawh khan league ṭan hmain Chelsea an champion an ring lo a, mah se an ring dik lo," tiin a sawi.
London club hian an squad tichhah turin transfer tawp niah Danny Drinkwater leh David Zappacosta te an lalut a, hemi te hma hian hmun pawimawh chang pha thei tur Alvaro Morata, Tiemoue Bakayoko leh Antonio Rudiger te an la lut bawk. Spanish forward Morata hian season ṭan hmain beisei pha lo mah se league match liah goal thum a khung a, an khelh tawh chinah coach Conte nena inhmu thiam lo Diego Costa a thlak zo hle.