Smalling leh Lindelof inkawp dawn
Manchester United chuan zanin hian Jose Mourinho hnuaia Champions League match hmasa ber an khel dawn a, Old Trafford-ah Swiss Super League champion FC Basel an mikhual dawn. Portuguese manager Mourinho hian tlarhnungah Chris Smalling leh Victor Lindelof te an inkawp tur thu a tichiang tawh.
United hian league match vawi li an khelh tawhah Eric Bailly leh Phil Jones te an inkawp vek a, match hnuhnung bera Stoke City nen goal an chhuah tih loh chu an lamah goal a la lut lo. Amaherawhchu, United defender pahnih Bailly leh Jones te hi hrem vangin an inlan thei dawn lo.
Red Devils manager Jose Mourinho chuan, "Bailly leh Jones te hi Smalling leh Lindelof te inkawp aiin an ṭha loh zawkna a awm lo a, theihna inang khat an ni a, mihrang daih an nihna hi an danglamna a ni. Lindelof tan Champions League hi thil thar a ni lo a, Premier League aiin atan a awlsam zawk ang," tiin a sawi.
Zanina inlan tur Smalling leh Lindelof te hi UEFA Super Cup-a Real Madrid an hmachhawn ṭumin an inkawp a, 1-2 a an chak loh hnuah an la inlan leh lo. Hemi ṭuma Red Devils tana goal khungtu Romelu Lukaku chuan league match vawi li a khelhah goal li a khung tawh.
Belgian striker Lukaku hian Champions League a la khel ngai lo a, Europe-a inelna sang berah eng chiaha ṭha nge a nih fiahin a awm ang. United leh Basel inkhel hi Sony Ten 1-ah a en theih ang a, Group A inkhel dangah Benfica leh CSKA Moscow te an inhmachhawn bawk ang.