National Junior pahnihna Rinpuia

National Ranking Table Tennis Cham­pionship 2017 (South Zone) chu September 6-12 chhung khan Dharwad, Karnataka-ah neih a ni a, Mizo rawlthar Lalrinpuia chuan silver medal a hlawh chhuak.

Mizo zinga national youth champion hmasa ber Rinpuia hian final lut tur hian national ranking central zone champion lai Ronit Bhanja (West Bengal) 4-2, tun inelna bika seeded pahnihna Utkarsh Gupta (Delhi) 4-1 leh seeded pariatna Peyush Prasad (Delhi) 4-0 te a hneh a, final-ah Manav Thakkar (PSPB) lakah straight game in a chak lo thung.

India sub junior leh cadet number 1 ni tawh Rinpuia chuan, "Season tir lamah beisei anga ka khelh theih loh avangin tun ṭuma silver ka dawng thei hi ka lawm hle. Ranking nei ṭha tur chuan result neih ṭhat a ngai a, inbuatsaihna ṭha tak ka neih vanga hetiang dinhmun thleng thei hi ka ni," tiin Vanglaini a hrilh.

Maubawk rawlthar Rinpuia hian international level-ah medal 20 a la tling tawh a, national level bikah hian medal 59 zet a la tawh bawk.