MBL awm hnuah Mizoramin hma a sawn?

North East Zone Inter State Badminton Championship chu kar liam ta khan R. Dengṭhuama Indoor Stadium-ah khelh zawh a ni a, senior mixed team-ah Manipur chu pakhatna niin Mizoram chu pahnihna an ni. Junior mixed team inelnaah Mizoram chuan champion zui ta Assam hneh loin an tla nghal.

Mizoram Badminton Associa­tion tan North East inelnaa pahnih­na nih hi thil thar a ni tawh lo a, amaherawhchu Mizoram Bad­minton League season hnih khelh zawh a nih hnua badminton-a Mizo­ram dinhmun hi eng ang chiah nge tih hriat a châkawm. Mizoram chhunga badminton inlena sang ber MBL awm hnuah Mizoram badminton-in hma a sawn tih a chu a lang a, nomawi a la ken tel loh avangin chhuan tham erawh a la ni lo.

Nomawi a hnai?

Mizoram hi pahnihna an ni a, final-a hneh loh Manipur chu Mizoram manager Zabiakthara chuan khelh fuh ṭumah chuan hneh theih tur an nih thu a sawi a, chutihrualin a nihna takah chuan Manipur leh Assam te chu Mizoram tluk loh an la ni tih a pha lo.

Mizoram manager Zabiakthara chuan, "Mizoram number 1 Manajit tel thei lo kan tuar a, doubles khel tura training nei Samuel-a'n singles khel thei turin kar khat chiah training a nei a, kan ṭhat dan berin kan khelh chhuah theih loh phah a ni. Inbuatsaihna kan neih

ṭantirh ang khan khel thei ngat ilang chuan Manipur kan hneh theih ngei ka ring," tiin MBL chhawr ṭangkai ber zinga mi Manajit Singh awm loh an tuar thu a zep lo.

Final-ah hian Mizoramin Mani­­pur hi 3-1 in an hneh lo a, doubles-ah Mizo chhuanvawr Lalmuan­awma leh Lalduhawma (Lal­mama) te inkawp chauhin hnehna an chang. Zabiakthara chuan, "Deciding chu khelh ngai se mixed doubles-ah chuan kan chak ngei ka ring," tiin Vanglaini a hrilh.

Mizoram badminton inelna sang ber MBL-ah hian hmeichhe tana khelh theih awmchhun chu mixed doubles chiah a ni a, women's singles leh doubles te telh a ni lo. India ram pum huap inelnaah mipa leh hmeichhe hlutna a inang chiah avangin MBL aṭanga hmasawnna state dang hneh thei tur khawp chuan a la huap kim lo niin a lang.

Chutihrualin Mizoram hian India junior number 1 ni reng ṭhin Laa Talar awmna state Arunachal Pradesh an hneh theih avangin chanchin lawm­awm hriat tur erawh a awm thung.

Hmasawnna tur

NE Badminton C'ship aṭangin Mizo shuttler ten thiamna aṭanga tehin state dang shuttler te skills an elpha tih a lang a, amaherawhchu hnufualna erawh a la awm.

Mizoram manager Zabiakthara chuan, "Tun ṭuma Mizoram aiawh te hi kum lama an upat avangin an fitness-ah chuan sawisel tur ka nei lo a, amaherawhchu kan la vaw na tawk lo. Point hmuh theihna mai turah kan zo mai thei ṭhin lo," tiin a sawi.

Inelna neih zawh tak kha kum bithliah inelna a nih loh avangin Mizote hian fitness-ah hmasawnna tur an la ngah tih a lang a, an kut thlak a nat theih nan training dan kalphung thar an neih a ṭul chho bawk ang.

Home Advantage?

Mizoram hian mahni ramah inelna an hmachhawn a, state dang aiin ṭantu an ngah chuang lo ang. A nihna takah chuan Mizo shuttler ten ṭantu ṭha an nei tawk lo.

Mizoram manager Zabiakthara chuan, "Badminton ngainatute ṭan kan mamawh a ni a, ṭha zawkin in-

ṭawiawm ilang chuan point tam tak au chhuahpui theih a ni," tiin home advantage a awm lo tih a pha lo.

Inelna lianah

Senior mixed team-ah Mizo­ram­in pahnihna dinhmun chauh an hauh phak avangin National championship-ah team an tir thei dawn lo a, Open inelnaah erawh semifinal lut pha chin a nih avangin inelna sang zawka tel tur Mizo shuttler an awm nual.

National C'ship-ah hian mixed doubles-a pakhatna Lalmama leh F. Lalhriatpuii te an tel dawn a, women's doubles-a pahnihna Hriati leh Lalrinzuali bakah men's singles semifinalist Samuel-a leh men's doubles semifinalist Muanawma leh Lalmama te an tel ang.

Kum 19 hnuai lam junior inel­naah boys doubles semifinalist John VL Hruaitluanga leh Lalrin­awma te leh girls doubles semi­finalist Lalvenhimi leh Zothansangi te an tel bawk ang.