Marquez-a'n hnehna changin Dovizioso a nihrual

MotoGP champion tum inum boruak a sang chho zel. Pathianni zan khan champion lai Marc Marquez chuan San Marino MotoGP-ah hnehna a chang a, rider championship-a hmahruaitu Andrea Dovizioso nen point 199 ve ve an hmu ta.

Ruah sur vangin Misano circuit a huh hle a, rider an fimkhur tlangin an inel tawk hle. Honda rider Marquez hian hnehna chang turin lap tawp ber thleng a nghah a ngai a, Ducati bike khalhtu Danilo Pettrucci nen intluktawk taka pahnihna dinhmun an inchuh hnuah hnehna a chang hram a ni.

Ducati rider pakhat zawk Andrea Dovizioso chu pa­thumnaah a thleng a, Yamaha rider Maverick Vinales chu palina a ni. Vinales-a teammate Valentino Rossi erawh a hliam vangin a la intlansiak ve thei lo.

World champion vawi thum ni tawh Marquez chuan, "Intlansiak chhung zawng khan rilru a hah tluan chhuak zak. Kawng a huh avangin chetsual a hlauhawm em em reng a, intlansiak tam zawka hmahruaitu ni thei Pettrucci tlanpelh kha thil harsa tak a ni. Championship inum boruak hi a rit chho tial tial dawn a, a beidawng leh hnual zawk ka nih loh ngei ka beisei," tiin tha thlah a tum lo hle.

Marquez a elpui kum 31 mi Dovizioso-a'n tun hnaiah a zawnin vawi hnih hnehna a chan theih avangin a vawi khat nan MotoGP champion nih theih a inbeiseina a sang hle. Hmahruai fal theihna hun ṭha a neih a hman ṭangkai theih tak loh avangin a tan nomawi chawina kawng a harsa chho sawt tura ngaih a ni.

Italian rider Dovizioso chuan, "Ṭum dang zawng aiin kan in um na zawk hialin ka hria, a bik takin Marc nena inum kha a hautak ka ti takzet a ni. Duhthusamah chuan pakhatna nih a ni a, chutihrualin a hmasa bera thlen reng theih erawh a ni lo. Tun ṭum intlansiak khaikhawm nan chuan point hmuh miah loh ai chuan point 16 hmuh chu ṭha tak a ni," tiin palina nih chu a chhe lo hlea a hriat thu a sawi.

Kumin MotoGP intlansiak awm tur 16 zinga 13 tlan zawh a ni tawh a, tlan hmabak panga bak a awm tawh lo. September 22 hian Spanish Grand Prix an tlan leh ang.