Newcastle United an chak nawn

Premier League kai thar Newcastle United-in an league match hmasa pahnihah an khingpui an hneh lo a, an match hnuhnung pahnihah erawh hnehna an chang ve ve. Rafael Benitez-a naute hian Jamaal Lascelles-a goal awmchhun khung hmangin Swansea City 1-0 in an va luhchhuah.

Pathianni zan inkhel pakhat zawkah minute thumna lekah Chris Wood goal hmangin Burnley chuan an mikhual Crystal Palace 1-0 in an hneh ve bawk.

Liberty Stadium-a inkhelah Swans forward Tammy Abraham-a'n mikhual goalkeeper Rob Elliot paltlang mah se a goal khung tur chu line aṭangin Lascelles-a'n a pet chhuah sak. Newcastle centre back Lascelles hian Matt Ritchie-a corner pet tauh lutin Premier League bikah kum 2015 hnua a vawi khat nan Magpies chu khualmualah hnehna a chanpui.

Bayern Munich aṭanga loan hmanga Swansea zawmtu Renato Sanches-a'n inkhel bul ṭan mah se beisei angin a khel chhuak nghal lo. Euro 2016-a best young player Sanches-a'n thlir bik a hlawh a, an sawi zui dan erawh a ṭha lo lam hlir a ni.

Newcastle manager Benitez chu kum hnih liam taa a ṭhal bawk zaina ennawn a nih vangin a naute inkhel a enkawl thei lo a, assistant manager Francisco de Miguel Moreno-a'n khualmualah a naute a kaihruai.

Miguel Moreno chuan, "Kan tum ber pakhat chu goal venhim kha a ni a, kan hlawhtling. Kan lawmna belhchhah turin Jamaal Lascelles-a'n chakna goal a khung bawk," tiin a zawna match hnih goal an chhuah lo ta chu a lawmthu a sawi.

Inkhel dangah Frank De Boer-a enkawl Crystal Palace-in chak ni hmel an la hmu thei lo. Palace hian an Premier League match hnuhnung pariatah hnehna an chang miah lo a, heng match-ah te hian first half-ah goal an chhuah vek a, an sut let tawh ngai lo - tun dinhmunah table mawngphah mawitu an ni.

Crystal Palace boss Frank De Boer chuan, "Inkhel kan thunun a, a chak lo zawka kan ṭang hi awih a har zawk hial a ni. Kan khelh danah chuan lungawi lohna tur a awm hran lo, result kan nei thei lo lai hi a mak a ni," tiin a sawi.