London-ah NFL khel dawn lo

NFL chuan kumin hian London-ah match li khelh turin ruahmanna siam mah se Covid-19 vangin an khel dawn lo.

American Football tihlar nan kum 2006 aṭangin London-ah match neih ṭhin a ni a, kumin hian Wembley Stadium leh Tottenham Hotspur Stadium-ah match hnih ve ve khelh tur a ni.

NFL commissioner Roger Goodell chuan, "Club thuneitute, sum thawhtute, sorkar leh medical lam thiamte rawn hnuah thutlukna siam a ni," tiin Covid-19 vanga ṭhulh a ṭul thu a sawi.

London mayor Sadiq Khan pawhin NFL thutlukna chu mipui himna tur a nih avangin thutlukna dik a nih thu a sawi a, Tottenham chairman Daniel Levy pawhin NFL thutlukna chu a thlawp thu a sawi ve bawk.

Nikum khan Tottenham Hotspur-in NFL an thlen avangin pound maktaduai khat hlawkna an hmu a, an sum hmuhna tam zawk erawh thil zawrh aṭangin a ni. Hemi aṭanga chhut chuan Spurs hian NFL match hnih an thlen theih loh avangin pound maktaduai 4 vel an chan dawn tihna a ni.