Messi hoin Argentina an inpeih

World Cup khel turin ram hrang hrang an inpuahchah mek a, champion tum ngam zinga mi Argentina pawh Lionel Messi hoin an inpeih tawh hle. South Amercian champion hian Inrinni zing dar 5:00 hian Honduras chu friendly match an khelhpui ang.

Messi-a'n inter-national break an neih hma match hnuhnung berah Paris Saint-Germain tan goal a khung a, a club hi Lyon lakah 1-0 in hnehna a chanpui. An chak hnuah Argentina captain hian, "Argentina tana inbuatsaihna ṭha tak a ni," tiin a sawi.

Barcelona aṭanga PSG a pan khan Messi hian thil duh leh tum tam tak a nei, chung zingah chuan an ram tana hlawhtlinna chan pawh a tel. Paris club nen an inrem danah hian, an ram Argentina kohna chu ngaih pawimawh a ni ang, tih thlengin a tel.

Club lamah chuan Messi hian nomawi chawi theih zawng zawng a chawi kim tawh. Argentina tan pawh Copa America title a la tawh a, a hmabak awmchhun chu World Cup chauh a ni tawh.

Lionel Scaloni enkawlna hnuaiah La Albiceleste hi team nghet tak an ni mek, tun hma deuh kha chuan hmatawng nei ṭha mah se an tlarhnung phui lo chu an buai phah ṭhin, tunah erawh a hnung lam pawh an inrem phui ta viau.

Manchester United defender Lisandro Martinez leh Tottenham tlarhnunga rinrawl Cristian Romero te an inkawp thei dawn a, anni pahnih bakah hian tawnhriat nei ṭha Nicolas Otamendi a la awm - ani hi Honduras lakah pawh bul ṭan tura rinkai a ni.

World champion vawi hnih ni tawh Argentina hian Honduras bakah Jamaica te friendly match an khelhpui dawn. World Cup atana inbuatsaihna hnuhnung ber atan erawh November thla hian United Arab Emirates nen an inkhel ang.