Roger Federer chuan a elpui leh ṭhianpa ni bawk Rafael Nadal chu a match hnuhnung ber khelhpui atan a duh a, tennis player ropui bik pahnih hi doubles huangah an inlan dun a nih pawhin a mak lo ang.
Grand Slam vawi 20 champion tawh Federer hian Laver Cup zawh hunah tennis a chawlhsan dawn. Tun kar tawpa khelh tur Laver Cup hi mimal inelna ni loin team inelna a ni a, singles leh doubles match a awm dawn.
Team Europe lamah Federer leh Nadal hi an awmdun ngei mai a, player dangte pawhin anni pahnih hi doubles khel dun tura an duh ngei a rinawm bawk a, kum dang zawng aiin Laver Cup hian ngaihven a hlawh phah ngei ang.
Swiss star Federer chuan, "Zep tur a awm lo, theih ni se chu duhthusam a ni. Rafa nen kan khel dun thei a nih chuan a hlu zual ngei ang, hun rei tak chhung inel tawh kha kan ni a, thawnthu pawh tam tak kan nei tawh.
"Inelna kan nei a ni satliah lo, kan chhungkua leh coaching team thlengin kan inzah tawn hle. Kan khel dun thei ngei dawn em tih a la chiang lo, chutih rualin theih ni se chu a duhawm hle," tiin a sawi.
Federer leh Nadal te awmna Team Europe-ah hian Novak Djokovic leh Andy Murray te an awm ve bawk. An khingpui tur Team World lamah Taylor Fritz, Felix Auger-Aliassime leh Diego Schwartzman te an awm ve thung.